ਹਰਮਨਪ੍ਰੀਤ ਸਿੰਘ ਦੀ ਹੈਟ੍ਰਿਕ ਦੇ ਦਮ ’ਤੇ ਆਖਰੀ ਲੀਗ ਮੈਚ ’ਚ ਵੇਲਜ਼ ਨੂੰ 4-1 ਨਾਲ ਹਰਾ ਕੇ ਭਾਰਤੀ ਟੀਮ ਨੇ ਪੂਲ ‘ਬੀ’ ਵਿੱਚ ਸਿਖਰ ’ਤੇ ਰਹਿੰਦਿਆਂ ਕਾਮਨਵੈਲਥ ਗੇਮਜ਼ ’ਚ ਪੁਰਸ਼ਾਂ ਦੇ ਹਾਕੀ ਮੁਕਾਬਲੇ ਦੇ ਸੈਮੀ ਫਾਈਨਲ ’ਚ ਥਾਂ ਬਣਾ ਲਈ ਹੈ। ਪਹਿਲੇ ਮੈਚ ’ਚ ਘਾਨਾ ਨੂੰ 11-0 ਨਾਲ ਅਤੇ ਤੀਜੇ ਮੈਚ ’ਚ ਕੈਨੇਡਾ ਨੂੰ 8-0 ਨਾਲ ਹਰਾਉਣ ਵਾਲੀ ਭਾਰਤੀ ਟੀਮ ਨੇ ਇੰਗਲੈਂਡ ਨਾਲ 4-4 ਨਾਲ ਡਰਾਅ ਖੇਡਿਆ ਸੀ। ਵਿਸ਼ਵ ਰੈਕਿੰਗ ’ਚ ਪੰਜਵੇਂ ਸਥਾਨ ’ਤੇ ਕਾਬਜ਼ ਮਨਪ੍ਰੀਤ ਸਿੰਘ ਦੀ ਭਾਰਤੀ ਟੀਮ ਪਲੱਸ 22 ਦੀ ਗੋਲ ਔਸਤ ਨਾਲ ਪੂਲ ‘ਬੀ’ ਵਿੱਚ ਸਿਖਰ ’ਤੇ ਰਹੀ ਅਤੇ ਹੁਣ ਸੈਮੀਫਾਈਨਲ ’ਚ ਉਸ ਦਾ ਸਾਹਮਣਾ ਆਸਟਰੇਲੀਆ ਨਾਲ ਨਹੀਂ ਹੋਵੇਗਾ ਬਸ਼ਰਤੇ ਇੰਗਲੈਂਡ ਆਖਰੀ ਮੈਚ ’ਚ ਕੈਨੇਡਾ ਨੂੰ 15-0 ਨਾਲ ਨਾ ਹਰਾਵੇ। ਇੰਗਲੈਂਡ ਨੂੰ ਅਜੇ ਕੈਨੇਡਾ ਨਾਲ ਆਖਰੀ ਮੈਚ ਖੇਡਣਾ ਹੈ ਅਤੇ 15 ਗੋਲ ਦੇ ਫਰਕ ਨਾਲ ਜਿੱਤ ਦਰਜ ਕਰਕੇ ਹੀ ਉਹ ਸਿਖਰ ’ਤੇ ਪਹੁੰਚ ਸਕਦਾ ਹੈ। ਸਿਖਰ ’ਤੇ ਰਹਿਣ ਵਾਲੀ ਟੀਮ ਨੂੰ ਸੈਮੀਫਾਈਨਲ ’ਚ ਨਹੀਂ ਖੇਡਣਾ ਪਵੇਗਾ। ਟੋਕੀਓ ਓਲੰਪਿਕਸ ’ਚ ਕਾਂਸੀ ਦਾ ਤਗ਼ਮਾ ਜੇਤੂ ਇੰਡੀਆ ਨੇ ਆਖਰੀ ਲੀਗ ਮੈਚ ’ਚ ਹਮਲਾਵਰ ਸ਼ੁਰੂਆਤ ਕੀਤੀ ਅਤੇ ਦੂਜੇ ਕੁਆਰਟਰ ’ਚ ਹਰਮਨਪ੍ਰੀਤ ਨੇ ਦੋ ਪੈਨਲਟੀ ਕਾਰਨਰ ਗੋਲ ’ਚ ਤਬਦੀਲ ਕਰਕੇ ਟੀਮ ਨੂੰ ਅੱਧੇ ਸਮੇਂ ਤੱਕ 2-0 ਦੀ ਲੀਡ ਦਿਵਾ ਦਿੱਤੀ। ਹਰਮਨਪ੍ਰੀਤ ਤੇ ਗੁਰਜੰਟ ਸਿੰਘ ਨੇ ਆਖਰੀ ਦੋ ਕੁਆਰਟਰ ’ਚ ਇਕ-ਇਕ ਗੋਲ ਕਰਕੇ ਲੀਡ ਨੂੰ 4-0 ਤੱਕ ਕਰ ਦਿੱਤਾ ਸੀ। ਵੇਲਜ਼ ਵੱਲੋਂ ਇੱਕਲੌਤਾ ਗੋਲ ਜੈਰੇਥ ਫਰਲੌਂਗ ਨੇ ਚੌਥੇ ਕੁਆਰਟਰ ’ਚ ਕੀਤਾ। ਇੰਡੀਆ ਵੱਲੋਂ ਹਰਮਨਪ੍ਰੀਤ ਨੇ 19ਵੇਂ, 20ਵੇਂ ਤੇ 40ਵੇਂ ਮਿੰਟ ’ਚ ਦੋ ਗੋਲ ਪੈਨਲਟੀ ਕਾਰਨਰ ’ਤੇ ਦਾਗੇ ਤੇ ਇਕ ਗੋਲ ਪੈਨਲਟੀ ਸਟ੍ਰੋਕ ਕੀਤਾ ਜਦਕਿ ਗੁਰਜੰਟ ਨੇ 49ਵੇਂ ਮਿੰਟ ’ਚ ਫੀਲਡ ਗੋਲ ਦਾਗਿਆ। ਸੈਮੀਫਾਈਨਲ ਮੁਕਾਬਲੇ 6 ਅਗਸਤ ਸ਼ਨਿਚਰਵਾਰ ਨੂੰ ਹੋਣਗੇ।
