ਆਈ.ਪੀ.ਐੱਲ. ਮੈਚ ਦੌਰਾਨ ਮੁੰਬਈ ਇੰਡੀਅਨਜ਼ ਦੇ ਕਪਤਾਨ ਸੂਰਿਆਕੁਮਾਰ ਯਾਦਵ ਨੂੰ ਵਾਨਖੇੜੇ ਸਟੇਡੀਅਮ ‘ਚ ਕੋਲਕਾਤਾ ਨਾਈਟ ਰਾਈਡਰਜ਼ ਖ਼ਿਲਾਫ਼ ਹੌਲੀ ਓਵਰ-ਰੇਟ ਕਾਰਨ 12 ਲੱਖ ਰੁਪਏ ਦਾ ਜੁਰਮਾਨਾ ਲਾਇਆ ਗਿਆ। ਆਈ.ਪੀ.ਐੱਲ. ਕੋਡ ਆਫ ਕੰਡਕਟ ਤਹਿਤ ਘੱਟੋ-ਘੱਟ ਓਵਰ-ਰੇਟ ਨਾਲ ਸਬੰਧਤ ਇਹ ਟੀਮ ਦਾ ਸੀਜ਼ਨ ਦਾ ਪਹਿਲਾ ਅਪਰਾਧ ਸੀ, ਇਸ ਲਈ ਕਪਤਾਨ ਸੂਰਿਆਕੁਮਾਰ ‘ਤੇ 12 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਗਿਆ। ਮੁੰਬਈ ਨੇ ਮੈਚ 5 ਵਿਕਟਾਂ ਨਾਲ ਜਿੱਤਿਆ। ਉਥੇ ਹੀ ਕੇ.ਕੇ.ਆਰ. ਦੇ ਕਪਤਾਨ ਨਿਤੀਸ਼ ਰਾਣਾ ਨੂੰ ਮੈਚ ਦੌਰਾਨ ਆਈ.ਪੀ.ਐੱਲ. ਕੋਡ ਆਫ ਕੰਡਕਟ ਦੀ ਉਲੰਘਣਾ ਕਰਨ ਲਈ ਮੈਚ ਫ਼ੀਸ ਦਾ 25 ਫ਼ੀਸਦੀ ਜੁਰਮਾਨਾ ਲਗਾਇਆ ਗਿਆ। ਰਾਣਾ ਨੇ ਆਈ.ਪੀ.ਐੱਲ. ਕੋਡ ਆਫ ਕੰਡਕਟ ਦੀ ਧਾਰਾ 2.21 ਦੇ ਤਹਿਤ ‘ਲੈਵਲ 1’ ਦਾ ਅਪਰਾਧ ਮੰਨਿਆ ਹੈ। ਮੁੰਬਈ ਇੰਡੀਅਨਜ਼ ਦੇ ਗੇਂਦਬਾਜ਼ ਰਿਤਿਕ ਸ਼ੌਕੀਨ ‘ਤੇ ਲੀਗ ਦੇ ਕੋਡ ਆਫ ਕੰਡਕਟ ਤਹਿਤ ਦੀ ਉਲੰਘਣਾ ਕਰਨ ‘ਤੇ 10 ਫ਼ੀਸਦੀ ਜੁਰਮਾਨਾ ਲਗਾਇਆ ਗਿਆ ਹੈ। ਇਸ ਮੈਚ ‘ਚ ਭਾਰਤੀ ਘਰੇਲੂ ਕ੍ਰਿਕਟ ਦੇ 2 ਖਿਡਾਰੀਆਂ ਦੀ ਆਪਸੀ ਰੰਜਿਸ਼ ਵੀ ਦੇਖਣ ਨੂੰ ਮਿਲੀ। ਰਾਣਾ ਅਤੇ ਸ਼ੋਕੀਨ ਵਿਚਾਲੇ ਤਿੱਖੀ ਬਹਿਸ ਹੋਈ। ਇਹ ਘਟਨਾ ਕੇਕੇਆਰ ਦੀ ਪਾਰੀ ਦੇ ਨੌਵੇਂ ਓਵਰ ‘ਚ ਵਾਪਰੀ, ਜਦੋਂ ਸ਼ੌਕੀਨ ਨੇ ਰਾਣਾ ਨੂੰ ਆਊਟ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਕੁਝ ਕਿਹਾ। ਰਾਣਾ ਨੇ ਇਸ ਤੋਂ ਬਾਅਦ ਪਲਟ ਕੇ ਸ਼ੌਕੀਨ ਵੱਲ ਵਧਦੇ ਹੋਏ ਕੁਝ ਕਿਹਾ। ਮੁੰਬਈ ਇੰਡੀਅਨਜ਼ ਦੇ ਸਟੈਂਡ-ਇਨ ਕਪਤਾਨ ਸੂਰਿਆਕੁਮਾਰ ਯਾਦਵ ਅਤੇ ਟੀਮ ਦੇ ਸਭ ਤੋਂ ਸੀਨੀਅਰ ਖਿਡਾਰੀ ਪੀਯੂਸ਼ ਚਾਵਲਾ ਨੇ ਹਾਲਾਂਕਿ ਮਾਮਲੇ ਨੂੰ ਸ਼ਾਂਤ ਕਰਨ ਲਈ ਦਖ਼ਲ ਦਿੱਤਾ। ਸ਼ੌਕੀਨ ਨੇ ਆਈ.ਪੀ.ਐੱਲ. ਕੋਡ ਆਫ ਕੰਡਕਟ ਦੀ ਧਾਰਾ 2.5 ਦੇ ਤਹਿਤ ‘ਲੈਵਲ 1’ ਦਾ ਜੁਰਮ ਮੰਨਿਆ ਹੈ। ਕੋਡ ਆਫ ਕੰਡਕਟ ਦੇ ‘ਲੈਵਲ ਵਨ’ ਦੀ ਉਲੰਘਣਾ ਲਈ, ਮੈਚ ਰੈਫਰੀ ਦਾ ਫੈਸਲਾ ਅੰਤਿਮ ਹੁੰਦਾ ਹੈ।
