ਸਿਟੀ ਆਫ ਟੋਰਾਂਟੋ ਨੇ ਆਪਣੀਆ ਸੰਵੇਦਨਸ਼ੀਲ ਥਾਵਾਂ ਉਤੇ ਕੋਵਿਡ-19 ਦੇ ਖਤਰੇ ਕਾਰਨ ਐੱਨ95 ਮਾਸਕ ਪਾਉਣ ਬਾਬਤ ਦਾਡ਼੍ਹੀ ਸ਼ੇਵ ਕਰਨ ਦੇ ਫੈਸਲੇ ’ਚ ਧਾਰਮਿਕ ਆਧਾਰ ’ਤੇ ਛੋਟ ਮੰਗਣ ਵਾਲੇ ਮੁਲਾਜ਼ਮਾਂ ਅਤੇ ਸਕਿਉਰਟੀ ਗਾਰਡਾਂ ਨੂੰ ਦਾਡ਼੍ਹੀ ਨਾਲ ਕੰਮ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਹੈ। ਸਿੱਖ ਸਕਿਉਰਟੀ ਗਾਰਡ ਨੂੰ ਦੋਬਾਰਾ ਕੰਮ ’ਤੇ ਲਗਾਉਣ ਦਾ ਪ੍ਰਾਈਵੇਟ ਕੰਟਰੈਕਟਰ ਨੂੰ ਆਦੇਸ਼ ਜਾਰੀ ਕਰ ਦਿੱਤਾ ਹੈ। ਸਿਟੀ ਆਫ ਟੋਰਾਂਟੋ ਨੇ ਕਿਹਾ ਹੈ ਜੋ ਮੁਲਾਜ਼ਮ ਧਾਰਮਿਕ ਆਧਾਰ ’ਤੇ ਦਾਡ਼੍ਹੀ ਸ਼ੇਵ ਨਹੀਂ ਕਰ ਸਕਦੇ ਉਹ ਦਾਡ਼੍ਹੀ ਨਾਲ ਹੀ ਕੰਮ ਕਰ ਸਕਣਗੇ। ਸਿਟੀ ਦੇ ਪਹਿਲੇ ਫ਼ੈਸਲੇ ਨਾਲ ਤਕਰੀਬਨ 100 ਸਕਿਉਰਟੀ ਗਾਰਡਾਂ ਨੂੰ ਪ੍ਰਾਈਵੇਟ ਕੰਟਰੈਕਟਰਾਂ ਵੱਲੋਂ ਹੋਰ ਜਗ੍ਹਾ ਤਬਦੀਲ ਕੀਤਾ ਗਿਆ ਸੀ ਜਾਂ ਕੰਮ ਤੋਂ ਹਟਾਇਆ ਗਿਆ ਸੀ। ਵਰਲਡ ਸਿੱਖ ਆਰਗਨਾਈਜ਼ੇਸ਼ਨ ਵੱਲੋਂ ਵੱਡੇ ਪੱਧਰ ’ਤੇ ਇਹ ਮੁੱਦਾ ਚੁੱਕਿਆ ਗਿਆ ਸੀ। ਇਹ ਫ਼ੈਸਲਾ ਲਾਗੂ ਹੋਣ ਸਮੇਂ 100 ਤੋਂ ਵੱਧ ਸਿੱਖ ਵਿਅਕਤੀਆਂ ਨੇ ਟੋਰਾਂਟੋ ਸਿਟੀ ’ਚ ਪ੍ਰਾਈਵੇਟ ਸੁਰੱਖਿਆ ਗਾਰਡਾਂ ਵਜੋਂ ਆਪਣੀਆਂ ਨੌਕਰੀਆਂ ਗੁਆ ਦਿੱਤੀਆਂ ਕਿਉਂਕਿ ਇਸ ਨੀਤੀ ਦੇ ਤਹਿਤ ਉਨ੍ਹਾਂ ਲਈ ਕਲੀਨਸ਼ੇਵ ਹੋਣਾ ਲਾਜ਼ਮੀ ਕੀਤਾ ਗਿਆ ਸੀ ਤਾਂ ਜੋ ਉਹ ਕੰਮ ਕਰਦੇ ਸਮੇਂ ਸਹੀ ਢੰਗ ਨਾਲ ਫਿਟਿੰਗ ਐੱਨ95 ਰੈਸਪੀਰੇਟਰ ਮਾਸਕ ਪਹਿਨ ਸਕਣ। ਅਜਿਹੇ ਸਮੇਂ ’ਚ ਜਦੋਂ ਸ਼ਹਿਰ ਭਰ ’ਚ ਜ਼ਿਆਦਾਤਰ ਸੈਟਿੰਗਾਂ ’ਚ ਕੋਵਿਡ-19 ਮਾਸਕ ਦੇ ਹੁਕਮਾਂ ਨੂੰ ਹਟਾ ਦਿੱਤਾ ਗਿਆ ਹੈ, ਵਰਲਡ ਸਿੱਖ ਆਰਗੇਨਾਈਜ਼ੇਸ਼ਨ ਆਫ਼ ਕੈਨੇਡਾ ਨੇ ਇਸ ਨੀਤੀ ਨੂੰ ‘ਬੇਤੁਕਾ’ ਕਿਹਾ। ਜਥੇਬੰਦੀ ਨੇ ਕਿਹਾ ਕਿ ਗਾਰਡਾਂ ਨੂੰ ਉਨ੍ਹਾਂ ਦੇ ਵਿਸ਼ਵਾਸ ਲਈ ਸਜ਼ਾ ਦਿੱਤੀ ਜਾ ਰਹੀ ਹੈ। 24 ਘੰਟੇ ’ਚ ਸ਼ਹਿਰ ਦੇ ਇਕ ਸੁਰੱਖਿਆ ਗਾਰਡ ਦੇ ਅਹੁਦੇ ਤੋਂ ਹਟਾਏ ਗਏ ਬੀਰਕਵਲ ਸਿੰਘ ਨੇ ਕਿਹਾ ਕਿ ਜੇਕਰ ਤੁਸੀਂ ਮੈਨੂੰ ਆਪਣੀ ਦਾਡ਼੍ਹੀ ਨੂੰ ਸ਼ੇਵ ਕਰਨ ਲਈ ਕਿਹਾ ਹੈ ਤਾਂ ਇਹ ਕੁਝ ਅਜਿਹਾ ਹੈ ਜਿਵੇਂ ਕਿ ਦੂਜੇ ਵਿਅਕਤੀ ਨੂੰ ਉਸ ਦੀ ਚਮਡ਼ੀ ਲਾਹੁਣ ਲਈ ਕਿਹਾ ਜਾਵੇ। ਇਹ ਮੇਰੇ ਲਈ ਸੱਚਮੁੱਚ ਅਪਮਾਨਜਨਕ ਹੈ। ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਦੇ ਬੁਲਾਰੇ ਡੌਨ ਪੀਟ ਨੇ ਕਿਹਾ ਸੀ ਕਿ ਜੂਨ ਦੇ ਅੱਧ ’ਚ ਵਰਲਡ ਸਿੱਖ ਆਰਗੇਨਾਈਜੇਸ਼ਨ ਆਫ ਕੈਨੇਡਾ ਤੋਂ ਸ਼ਿਕਾਇਤ ਮਿਲਣ ਤੋਂ ਬਾਅਦ ਟੋਰੀ ਨੇ ਸਿਟੀ ਸਟਾਫ ਨੂੰ ਨੀਤੀ ਦੀ ਜਾਂਚ ਕਰਨ ਲਈ ਕਿਹਾ। ਪੀਟ ਨੇ ਕਿਹਾ ਕਿ ਮੇਅਰ ਨੇ ਇਸ ਹਫ਼ਤੇ ਸਟਾਫ਼ ਦੇ ਮੈਂਬਰਾਂ ਨਾਲ ਇਕ ਬੇਨਤੀ ਕੀਤੀ ਕਿ ਉਹ ਠੇਕੇਦਾਰਾਂ ਨਾਲ ਕੰਮ ਕਰਨ ਲਈ ‘ਇਸ ਮੁੱਦੇ ਨੂੰ ਤੁਰੰਤ ਹੱਲ ਕਰਨ’ ਲਈ ਕੰਮ ਕਰਨ। ਵਰਲਡ ਸਿੱਖ ਆਰਗੇਨਾਈਜ਼ੇਸ਼ਨ ਆਫ ਕੈਨੇਡਾ ਦੇ ਕਾਨੂੰਨੀ ਸਲਾਹਕਾਰ ਬਲਪ੍ਰੀਤ ਸਿੰਘ ਨੇ ਕਿਹਾ ਕਿ ਪ੍ਰਭਾਵਿਤ ਗਾਰਡਾਂ ਵਿੱਚੋਂ ਬਹੁਤ ਸਾਰੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੇ ਰੂਪ ’ਚ ਇੰਡੀਆ ਤੋਂ ਕੈਨੇਡਾ ਆਏ ਸਨ। ਪਰ ਹੁਣ ਇਹ ਫ਼ੈਸਲਾ ਵਾਪਸ ਲੈ ਕੇ ਸਿੱਖ ਸਕਿਉਰਿਟੀ ਗਾਰਡਾਂ ਨੂੰ ਰਾਹਤ ਪ੍ਰਦਾਨ ਕੀਤੀ ਗਈ ਹੈ।
