ਮਸਕਟ ਦੇ ਅਲ ਅਮਰਾਤ ਕ੍ਰਿਕਟ ਸਟੇਡੀਅਮ ‘ਚ ਹਾਂਗਕਾਂਗ ਨੇ ਸੰਯੁਕਤ ਅਰਬ ਅਮੀਰਾਤ (ਯੂ.ਏ.ਈ.) ਨੂੰ 8 ਵਿਕਟਾਂ ਨਾਲ ਹਰਾ ਕੇ ਏਸ਼ੀਆ ਕੱਪ ਕ੍ਰਿਕਟ ਟੂਰਨਾਮੈਂਟ ਲਈ ਕੁਆਲੀਫਾਈ ਕਰ ਲਿਆ ਹੈ। ਉਸ ਨੂੰ ਇੰਡੀਆ ਅਤੇ ਪਾਕਿਸਤਾਨ ਦੇ ਨਾਲ ਗਰੁੱਪ ਏ ‘ਚ ਰੱਖਿਆ ਗਿਆ ਹੈ। ਅਫਗਾਨਿਸਤਾਨ, ਬੰਗਲਾਦੇਸ਼ ਅਤੇ ਸ਼੍ਰੀਲੰਕਾ ਮੁਕਾਬਲੇ ਦੇ ਗਰੁੱਪ ਬੀ ‘ਚ ਹਨ। ਏਸ਼ੀਆ ਕੱਪ ਕੁਆਲੀਫਾਇਰ ਦਾ ਫਾਈਨਲ ਮੈਚ ਯੂ.ਏ.ਈ. ਅਤੇ ਹਾਂਗਕਾਂਗ ਲਈ ਫਾਈਨਲ ਵਰਗਾ ਸੀ। ਯੂ.ਏ.ਈ. ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 19.3 ਓਵਰਾਂ ‘ਚ 147 ਦੌੜਾਂ ਬਣਾਈਆਂ। ਉਸ ਲਈ ਚੁੰਡੰਗਾਪੋਇਲ ਰਿਜ਼ਵਾਨ ਨੇ 49 ਅਤੇ ਜ਼ਵਾਰ ਫਰੀਦ ਨੇ 43 ਦੌੜਾਂ ਦਾ ਯੋਗਦਾਨ ਪਾਇਆ। ਹਾਂਗਕਾਂਗ ਲਈ ਅਹਿਸਾਨ ਖਾਨ ਨੇ 24 ਦੌੜਾਂ ਦੇ ਕੇ 4 ਜਦਕਿ ਆਯੂਸ਼ ਸ਼ੁਕਲਾ ਨੇ 30 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ। ਹਾਂਗਕਾਂਗ ਨੇ 19.3 ਓਵਰਾਂ ‘ਚ 2 ਵਿਕਟਾਂ ‘ਤੇ 149 ਦੌੜਾਂ ਬਣਾ ਕੇ ਜਿੱਤ ਦਰਜ ਕੀਤੀ। ਨਿਜ਼ਾਕਤ ਖਾਨ (39), ਯਾਸਿਮ ਮੁਰਤਜ਼ਾ (58) ਅਤੇ ਬਾਬਰ ਹਯਾਤ (ਅਜੇਤੂ 38) ਨੇ ਹਾਂਗਕਾਂਗ ਦੀ ਜਿੱਤ ‘ਚ ਅਹਿਮ ਭੂਮਿਕਾ ਨਿਭਾਈ। ਹਾਂਗਕਾਂਗ ਨੇ ਕੁਆਲੀਫਾਇਰ ‘ਚ ਆਪਣੇ ਤਿੰਨੇ ਮੈਚ ਜਿੱਤੇ ਅਤੇ 6 ਅੰਕਾਂ ਨਾਲ ਸੂਚੀ ‘ਚ ਸਿਖਰ ‘ਤੇ ਰਿਹਾ। ਉਸ ਨੇ ਦੂਜੀ ਵਾਰ ਏਸ਼ੀਆ ਕੱਪ ‘ਚ ਥਾਂ ਬਣਾਈ ਹੈ। ਇਸ ਤੋਂ ਪਹਿਲਾਂ ਉਹ 2018 ‘ਚ ਵੀ ਇਸ ਮੁਕਾਬਲੇ ਦਾ ਹਿੱਸਾ ਸੀ। ਯੂ.ਏ.ਈ. ਵਿੱਚ 27 ਅਗਸਤ ਤੋਂ ਸ਼ੁਰੂ ਹੋ ਰਹੇ ਏਸ਼ੀਆ ਕੱਪ ‘ਚ ਹਾਂਗਕਾਂਗ ਦਾ ਸਾਹਮਣਾ 31 ਅਗਸਤ ਨੂੰ ਇੰਡੀਆ ਅਤੇ 2 ਸਤੰਬਰ ਨੂੰ ਪਾਕਿਸਤਾਨ ਨਾਲ ਹੋਵੇਗਾ।
