ਏਸ਼ੀਅਨ ਸ਼ਤਰੰਜ ਮਹਾਸੰਘ ਨੇ ਭਾਰਤੀ ਗਰੈਂਡ ਮਾਸਟਰ ਡੀ. ਗੁਕੇਸ਼ ਨੂੰ ਪਿਛਲੇ ਸਾਲ ਮਹਾਬਲੀਪੁਰਮ ‘ਚ 44ਵੇਂ ਸ਼ਤਰੰਜ ਓਲੰਪਿਆਡ ‘ਚ ਰਿਕਾਰਡ ਸਕੋਰ (9/11) ਨਾਲ ਸੋਨ ਤਗ਼ਮਾ ਜਿੱਤਣ ਲਈ ‘ਪਲੇਅਰ ਆਫ ਦਿ ਈਅਰ’ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ। ਪਿਛਲੇ ਸਾਲ ਮਾਰਚ ‘ਚ ਗੁਕੇਸ਼ 2700 ਈ.ਐਓਲ.ਓ. ਰੇਟਿੰਗ ਦਾ ਅੰਕੜਾ ਪਾਰ ਕਰਨ ਵਾਲਾ 6ਵਾਂ ਭਾਰਤੀ ਬਣਿਆ ਸੀ ਅਤੇ ਉਹ 2700 ਤੋਂ ਉੱਤੇ ਦੀ ਰੇਟਿੰਗ ਵਾਲੇ ਦੇਸ਼ ਦਾ ਸਭ ਤੋਂ ਨੌਜਵਾਨ ਗਰੈਂਡ ਮਾਸਟਰ ਵੀ ਹੈ। ਅਖਿਲ ਭਾਰਤੀ ਸ਼ਤਰੰਜ ਮਹਾਸੰਘ ਨੇ ਏ.ਸੀ.ਐੱਫ. ਦੇ ਸਾਲਾਨਾ ਸੰਮੇਲਨ ਵਿੱਚ ‘ਮੋਸਟ ਐਕਟਿਵ ਫੈਡਰੇਸ਼ਨ’ ਦਾ ਇਨਾਮ ਹਾਸਲ ਕੀਤਾ। ਤਮਿਲਨਾਡੂ ਦੇ ਮੁੱਖ ਮੰਤਰੀ ਐੱਮ.ਕੇ. ਸਟਾਲਿਨ ਨੂੰ 4 ਮਹੀਨਿਆਂ ਦੇ ਘੱਟ ਸਮੇਂ ਦੇ ਨੋਟਿਸ ਦੇ ਅੰਦਰ ਪਿਛਲੇ ਸਾਲ ਅਗਸਤ ‘ਚ ਫਿਡੇ ਸ਼ਤਰੰਜ ਓਲੰਪਿਆਡ ਦੀ ਸਫਲ ਮੇਜ਼ਬਾਨੀ ਦੀ ਉਨ੍ਹਾਂ ਦੀ ਕੋਸ਼ਿਸ਼ ਲਈ ‘ਮੈਨ ਆਫ ਦਿ ਈਅਰ’ ਪੁਰਸਕਾਰ ਨਾਲ ਨਵਾਜਿਆ ਗਿਆ। ਭਾਰਤੀ ਮਹਿਲਾ ਟੀਮ ‘ਚ ਕੋਨੇਰੂ ਹੰਪੀ, ਡੀ. ਹਰਿਕਾ, ਆਰ. ਵੈਸ਼ਾਲੀ, ਤਨੀਆ ਸੱਚਦੇਵ ਅਤੇ ਭਗਤੀ ਕੁਲਕਰਣੀ ਨੂੰ ਕਾਂਸੀ ਤਗ਼ਮਾ ਜਿੱਤਣ ਲਈ ‘ਬੈਸਟ ਵੂਮੈਨਸ ਟੀਮ ਆਫ ਦਿ ਈਅਰ’ ਨਾਲ ਨਵਾਜਿਆ ਗਿਆ, ਜਦੋਂਕਿ ਗਰੈਂਡ ਮਾਸਟਰ ਆਰ.ਬੀ. ਰਮੇਸ਼ ਪੁਰਸ਼ਾਂ ਦੇ ‘ਕੋਚ ਆਫ ਦਿ ਈਅਰ’ ਪੁਰਸਕਾਰ ਅਤੇ ਗਰੈਂਡ ਮਾਸਟਰ ਅਭਿਜੀਤ ਕੁੰਤੇ ਔਰਤਾਂ ਦੇ ‘ਕੋਚ ਆਫ ਦਿ ਈਅਰ’ ਪੁਰਸਕਾਰ ਲਈ ਚੁਣੇ ਗਏ।
