ਇੰਡੀਆ ਤੇ ਪਾਕਿਸਤਾਨ ਵਿਚਕਾਰ ਹੋਏ ਏਸ਼ੀਆ ਕੱਪ ਦੇ ਫਸਵੇਂ ਮੈਚ ਦੌਰਾਨ ਟਾਸ ਜਿੱਤ ਕੇ ਪਾਕਿਸਤਾਨ ਨੇ ਇੰਡੀਆ ਨੂੰ ਪਹਿਲਾਂ ਬੱਲੇਬਾਜ਼ੀ ਦਾ ਸੱਦਾ ਦਿੱਤਾ। ਇੰਡੀਆ ਨੇ ਸ਼ੁਰੂਆਤ ‘ਚ ਤੇਜ਼ ਗਤੀ ਨਾਲ ਦੌੜਾਂ ਬਣਾਈਆਂ ਪਰ ਬਾਅਦ ‘ਚ ਇੰਡੀਆ ਦੀ ਪਾਰੀ ਇਕ ਤੋਂ ਬਾਅਦ ਇਕ ਵਿਕਟਾਂ ਡਿੱਗਣ ਨਾਲ ਲੜਖੜਾ ਗਈ। ਸਲਾਮੀ ਬੱਲੇਬਾਜ਼ ਮੁਹੰਮਦ ਰਿਜ਼ਵਾਨ ਦੇ ਅਰਧ ਸੈਂਕੜੇ ਤੇ ਮੁਹੰਮਦ ਨਵਾਜ਼ ਦੇ ਨਾਲ ਉਸਦੀ ਅਰਧ ਸੈਂਕੜੇ ਵਾਲੀ ਸਾਂਝੇਦਾਰੀ ਨਾਲ ਪਾਕਿਸਤਾਨ ਨੇ ਏਸ਼ੀਆ ਕੱਪ ਟੀ-20 ਕ੍ਰਿਕਟ ਟੂਰਨਾਮੈਂਟ ਦੇ ਸੁਪਰ-4 ਗੇੜ ਦੇ ਰੋਮਾਂਚਕ ਮੁਕਾਬਲੇ ‘ਚ ਇੰਡੀਆ ਨੂੰ 5 ਵਿਕਟਾਂ ਨਾਲ ਹਰਾ ਦਿੱਤਾ। ਇੰਡੀਆ ਦੀਆਂ 182 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਪਾਕਿਸਤਾਨ ਨੇ ਰਿਜ਼ਵਾਨ (51 ਗੇਂਦਾਂ ‘ਤੇ 71 ਦੌੜਾਂ) ਤੇ ਕਰੀਅਰ ਦੀ ਸਰਵਸ੍ਰੇਸ਼ਠ ਪਾਰੀ ਖੇਡਣ ਵਾਲੇ ਨਵਾਜ਼ (20 ਗੇਂਦਾਂ ‘ਤੇ 42 ਦੌੜਾਂ) ਵਿਚਾਲੇ ਤੀਜੀ ਵਿਕਟ ਲਈ 73 ਦੌੜਾਂ ਦੀ ਸਾਂਝੇਦਾਰੀ ਨਾਲ ਇਕ ਗੇਂਦ ਬਾਕੀ ਰਹਿੰਦਿਆਂ 5 ਵਿਕਟਾਂ ‘ਤੇ 182 ਦੌੜਾਂ ਬਣਾ ਕੇ ਜਿੱਤ ਦਰਜ ਕਰ ਲਈ। ਰਿਜ਼ਵਾਨ ਤੇ ਨਵਾਜ਼ ਦੇ ਆਊਟ ਹੋਣ ਤੋਂ ਬਾਅਦ ਆਸਿਫ ਅਲੀ (16) ਤੇ ਖੁਸ਼ਦਿਲ ਸ਼ਾਹ (ਅਜੇਤੂ 14) ਨੇ ਟੀਮ ਦੀ ਜਿੱਤ ਤੈਅ ਕੀਤੀ। ਇੰਡੀਆ ਲਈ ਰਵੀ ਬਿਸ਼ਨੋਈ (26 ਦੌੜਾਂ ‘ਤੇ 1 ਵਿਕਟ) ਤੇ ਅਰਸ਼ਦੀਪ ਸਿੰਘ (27 ਦੌੜਾਂ ‘ਤੇ 1 ਵਿਕਟ) ਨੇ ਸ਼ਾਨਦਾਰ ਗੇਂਦਬਾਜ਼ੀ ਕੀਤੀ ਪਰ ਟੀਮ ਨੂੰ ਜਿੱਤ ਨਹੀਂ ਦਿਵਾ ਸਕੇ। ਇਸ ਤੋਂ ਪਹਿਲਾਂ ਕੋਹਲੀ ਨੇ 44 ਗੇਂਦਾਂ ‘ਤੇ 4 ਚੌਕਿਆਂ ਤੇ 1 ਛੱਕੇ ਦੀ ਮਦਦ ਨਾਲ 60 ਦੌੜਾਂ ਦੀ ਪਾਰੀ ਖੇਡੀ। ਕਪਤਾਨ ਰੋਹਿਤ ਸ਼ਰਮਾ (28) ਤੇ ਲੋਕੇਸ਼ ਰਾਹੁਲ (28) ਦੀ ਸਲਾਮੀ ਜੋੜੀ ਨੇ ਇੰਡੀਆ ਨੂੰ ਤੇਜ਼ ਸ਼ੁਰੂਆਤ ਦਿਵਾਈ। ਬੱਲੇਬਾਜ਼ੀ ਕ੍ਰਮ ਵਿਚ ਇਨ੍ਹਾਂ ਟਾਪ-3 ਬੱਲੇਬਾਜ਼ਾਂ ਤੋਂ ਇਲਾਵਾ ਹੋਰ ਬੱਲੇਬਾਜ਼ ਹਾਲਾਂਕਿ ਟਿਕ ਕੇ ਨਹੀਂ ਖੇਡ ਸਕੇ। ਪਾਕਿਸਤਾਨ ਵਲੋਂ ਲੈੱਗ ਸਪਿਨਰ ਸ਼ਾਦਾਬ ਖਾਨ ਸਭ ਤੋਂ ਸਫਲ ਗੇਂਦਬਾਜ਼ ਰਿਹਾ, ਜਿਸ ਨੇ 31 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ। ਖੱਬੇ ਹੱਥ ਦੇ ਸਪਿਨਰ ਮੁਹੰਮਦ ਨਵਾਜ਼ ਨੇ ਕਿਫਾਇਤੀ ਗੇਂਦਬਾਜ਼ੀ ਕਰਦੇ ਹੋਏ 25 ਦੌੜਾਂ ਦੇ ਕੇ 1 ਵਿਕਟ ਹਾਸਲ ਕੀਤੀ। ਕਪਤਾਨ ਰੋਹਿਤ ਸ਼ਰਮਾ ਤੇ ਲੋਕੇਸ਼ ਰਾਹੁਲ ਨੇ 5.1 ਓਵਰਾਂ ‘ਚ 54 ਦੌੜਾਂ ਜੋੜ ਕੇ ਤੇਜ਼ ਸ਼ੁਰੂਆਤ ਦਿਵਾਈ। ਰੋਹਿਤ ਨੇ ਪਹਿਲੇ ਹੀ ਓਵਰ ‘ਚ ਨਸੀਮ ਸ਼ਾਹ ਦੀ ਗੇਂਦ ‘ਤੇ ਚੌਕਾ ਤੇ ਛੱਕਾ ਲਾਇਆ ਜਦਕਿ ਰਾਹੁਲ ਨੇ ਵੀ ਇਸ ਤੇਜ਼ ਗੇਂਦਬਾਜ਼ ਦੇ ਅਗਲੇ ਓਵਰ ‘ਚ ਦੋ ਛੱਕੇ ਮਾਰੇ। ਰੋਹਿਤ ਨੇ ਹੈਰਿਸ ਰਾਓਫ ਦਾ ਸਵਾਗਤ ਲਗਾਤਾਰ ਗੇਂਦਾਂ ‘ਤੇ ਚੌਕੇ ਤੇ ਛੱਕੇ ਦੇ ਨਾਲ ਕੀਤਾ ਪਰ ਇਸ ਤੇਜ਼ ਗੇਂਦਬਾਜ਼ ਦੇ ਅਗਲੇ ਓਵਰ ‘ਚ ਗੇਂਦ ਨੂੰ ਹਵਾ ‘ਚ ਲਹਿਰਾ ਕੇ ਖੁਸ਼ਦਿਲ ਸ਼ਾਹ ਨੂੰ ਕੈਚ ਦੇ ਬੈਠਾ।
