ਫੀਫਾ ਵਰਲਡ ਕੱਪ ਦੇ ਆਪਣੇ ਗਰੁੱਪ-ਐੱਫ ਦੇ ਮੁਕਾਬਲੇ ‘ਚ ਬੈਲਜੀਅਮ ਨੇ ਕੈਨੇਡਾ ਨੂੰ 1-0 ਨਾਲ ਹਰਾਇਆ। ਮੈਚ ‘ਚ ਬੈਲਜੀਅਮ ਲਈ ਇਕਲੌਤਾ ਗੋਲ ਮਿਕੀ ਬਾਤਸ਼ੁਆਈ ਨੇ ਕੀਤਾ ਅਤੇ ਇਹ ਇਕ ਗੋਲ ਬੈਲਜੀਅਮ ਲਈ ਕਾਫੀ ਸੀ ਕਿਉਂਕਿ ਕੈਨੇਡਾ ਮੈਚ ਦੇ ਅੰਤ ਤੱਕ ਇਕ ਵੀ ਗੋਲ ਨਹੀਂ ਕਰ ਸਕਿਆ। ਇਸ ਦੇ ਨਾਲ ਹੀ 36 ਸਾਲ ਬਾਅਦ ਵਰਲਡ ਕੱਪ ਖੇਡ ਰਹੇ ਕੈਨੇਡਾ ਨੂੰ ਆਪਣੇ ਪਹਿਲੇ ਹੀ ਮੈਚ ‘ਚ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਿਆ। ਕੈਨੇਡਾ ਨੇ 1986 ਤੋਂ ਵਰਲਡ ਕੱਪ ਲਈ ਕੁਆਲੀਫਾਈ ਕੀਤਾ ਹੈ। ਕੈਨੇਡਾ ਨੇ ਮੈਚ ਦਾ ਜ਼ਿਆਦਾਤਰ ਸਮਾਂ ਬੈਲਜੀਅਮ ਦੇ ਖੇਤਰ ‘ਚ ਬਿਤਾਇਆ, ਪਰ ਟੀਮ ਉੱਚ ਪੱਧਰੀ ਸਕੋਰਿੰਗ ਦੇ ਕਈ ਮੌਕਿਆਂ ਨੂੰ ਬਦਲਣ ‘ਚ ਨਾਕਾਮ ਰਹੀ। ਕੈਨੇਡਾ ਲਈ ਸਭ ਤੋਂ ਵਧੀਆ ਮੌਕਾ 10ਵੇਂ ਮਿੰਟ ‘ਚ ਆਇਆ ਜਦੋਂ ਅਲਫੋਂਸੋ ਡੇਵਿਸ ਨੂੰ ਹੈਂਡ ਗੇਂਦ ਲਈ ਵੀ.ਏ.ਆਰ. (ਵੀਡੀਓ ਅਸਿਸਟੈਂਟ ਰੈਫਰੀ) ਸਮੀਖਿਆ ਤੋਂ ਬਾਅਦ ਪੈਨਲਟੀ ਕਿੱਕ ਦਿੱਤੀ ਗਈ, ਪਰ ਬੈਲਜੀਅਮ ਦੇ ਕੀਪਰ ਥੀਬੌਟ ਕੋਰਟੋਇਸ ਨੇ ਅਲਫੋਂਸੋ ਡੇਵਿਸ ਦੀ ਪੈਨਲਟੀ ਕਿੱਕ ਦਾ ਵਧੀਆ ਬਚਾਅ ਕੀਤਾ। ਇਹ ਡੇਵਿਸ ਦੀ ਆਪਣੇ ਅੰਤਰਰਾਸ਼ਟਰੀ ਕਰੀਅਰ ਦੀ ਪਹਿਲੀ ਪੈਨਲਟੀ ਕੋਸ਼ਿਸ਼ ਸੀ। ਅੱਧੇ ਸਮੇਂ ਦੀ ਸੀਟੀ ਤੋਂ ਪਹਿਲਾਂ ਬੈਲਜੀਅਮ ਦੇ ਮਿਕੀ ਬਾਤਸ਼ੂਆ ਨੇ ਕੈਨੇਡੀਅਨ ਡਿਫੈਂਸ ਨੂੰ ਤੋੜਿਆ ਅਤੇ 44ਵੇਂ ਮਿੰਟ ‘ਚ ਗੋਲ ਕਰਕੇ ਆਪਣੀ ਟੀਮ ਨੂੰ 1-0 ਦੀ ਬੜ੍ਹਤ ਦਿਵਾਈ। ਇਸ ਤੋਂ ਬਾਅਦ ਮੈਚ ਦੇ ਦੂਜੇ ਹਾਫ ‘ਚ 79ਵੇਂ ਮਿੰਟ ‘ਚ ਕੈਨੇਡਾ ਨੂੰ ਇਕ ਹੋਰ ਅਹਿਮ ਮੌਕਾ ਮਿਲਿਆ ਪਰ ਕੈਨੇਡੀਅਨ ਖਿਡਾਰੀ ਕਾਈਲ ਲੈਰੀਨ ਦੇ ਇਕ ਹੈਡਰ ਨੂੰ ਬੈਲਜੀਅਮ ਦੇ ਗੋਲਕੀਪਰ ਥੀਬੌਟ ਕੋਰਟੋਇਸ ਨੇ ਸ਼ਾਨਦਾਰ ਤਰੀਕੇ ਨਾਲ ਬਚਾ ਲਿਆ। ਇਸ ਤੋਂ ਬਾਅਦ ਬੈਲਜੀਅਮ ਨੇ ਕੈਨੇਡਾ ਨੂੰ ਕੋਈ ਮੌਕਾ ਨਹੀਂ ਦਿੱਤਾ ਅਤੇ ਮੈਚ ਦੇ ਆਖਰੀ ਮਿੰਟ ਤੱਕ ਆਪਣੀ ਬੜ੍ਹਤ ਬਣਾਈ ਰੱਖੀ। ਇਸ ਦੇ ਨਾਲ ਹੀ ਮੈਚ ‘ਚ ਜਿੱਤ ਦੇ ਨਾਲ ਬੈਲਜੀਅਮ ਗਰੁੱਪ-ਐੱਫ ‘ਚ ਸਿਖਰ ‘ਤੇ ਪਹੁੰਚ ਗਿਆ ਹੈ।
