ਮੱਧ ਪ੍ਰਦੇਸ਼ ਦੇ ਵਿਦਿਸ਼ਾ, ਸਤਨਾ ਅਤੇ ਗੁਨਾ ਜ਼ਿਲ੍ਹਿਆਂ ‘ਚ ਪਿਛਲੇ ਚੌਵੀ ਘੰਟਿਆਂ ਦੌਰਾਨ ਅਸਮਾਨੀ ਬਿਜਲੀ ਡਿੱਗਣ ਕਾਰਨ 9 ਲੋਕਾਂ ਦੀ ਮੌਤ ਹੋ ਗਈ ਅਤੇ 2 ਹੋਰ ਝੁਲਸ ਗਏ। ਇਕ ਪੁਲੀਸ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿੱਤੀ। ਗੰਜਬਾਸੌਦਾ ਥਾਣੇ ਦੇ ਸਬ-ਇੰਸਪੈਕਟਰ ਕੁੰਵਰ ਸਿੰਘ ਮੁਕਾਤੀ ਨੇ ਦੱਸਿਆ ਕਿ ਵਿਦਿਸ਼ਾ ਜ਼ਿਲ੍ਹਾ ਹੈੱਡਕੁਆਰਟਰ ਤੋਂ ਕਰੀਬ 45 ਕਿਲੋਮੀਟਰ ਦੂਰ ਗੰਜਬਾਸੋਦਾ ਤਹਿਸੀਲ ਦੇ ਅਗਸੌਦ ਪਿੰਡ ‘ਚ ਬਿਜਲੀ ਡਿੱਗਣ ਨਾਲ ਇਮਲੀ ਦੇ ਦਰੱਖਤ ਹੇਠਾਂ ਖੜ੍ਹੇ 4 ਲੋਕਾਂ ਦੀ ਮੌਤ ਹੋ ਗਈ। ਉਨ੍ਹਾਂ ਦੱਸਿਆ ਕਿ ਮ੍ਰਿਤਕਾਂ ਦੀ ਪਛਾਣ ਗਾਲੂ ਮਾਲਵੀਆ, ਰਾਮੂ, ਗੁੱਡਾ ਅਤੇ ਪ੍ਰਭੂ ਲਾਲ ਵਜੋਂ ਹੋਈ ਹੈ। ਸਾਰੇ ਮ੍ਰਿਤਕਾਂ ਦੀ ਉਮਰ 30 ਤੋਂ 40 ਸਾਲ ਦਰਮਿਆਨ ਸੀ। ਮੁਕਾਤੀ ਅਨੁਸਾਰ ਤੇਜ਼ ਮੀਂਹ ਕਾਰਨ ਚਾਰੋਂ ਦਰੱਖਤ ਹੇਠਾਂ ਖੜ੍ਹੇ ਸਨ, ਜਦੋਂ ਤੇਜ਼ ਝੱਖੜ ਨਾਲ ਦਰੱਖਤ ‘ਤੇ ਬਿਜਲੀ ਡਿੱਗ ਗਈ ਜਿਸ ਦੀ ਲਪੇਟ ‘ਚ ਉਨ੍ਹਾਂ ਦੀ ਮੌਤ ਹੋ ਗਈ। ਉਨ੍ਹਾਂ ਦੱਸਿਆ ਕਿ ਪੋਸਟਮਾਰਟਮ ਤੋਂ ਬਾਅਦ ਚਾਰੇ ਲਾਸ਼ਾਂ ਵਾਰਸਾਂ ਨੂੰ ਸੌਂਪ ਦਿੱਤੀਆਂ ਗਈਆਂ ਹਨ। ਪੁਲੀਸ ਮੁਤਾਬਕ ਇਕ ਹੋਰ ਘਟਨਾ ‘ਚ ਸਤਨਾ ਜ਼ਿਲ੍ਹੇ ਦੇ ਨਾਗੌਦ ਥਾਣਾ ਖੇਤਰ ਦੇ ਪੋਡੀ-ਪਟੌਰਾ ਪਿੰਡ ‘ਚ ਬਿਜਲੀ ਡਿੱਗਣ ਕਾਰਨ ਇਕ ਖੇਤ ‘ਚ ਕੰਮ ਕਰ ਰਹੇ ਤਿੰਨ ਲੋਕਾਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਦੋ ਬੱਚੇ ਬੁਰੀ ਤਰ੍ਹਾਂ ਝੁਲਸ ਗਏ। ਉਨ੍ਹਾਂ ਨੂੰ ਇਲਾਜ ਲਈ ਨੇੜਲੇ ਹਸਪਤਾਲ ‘ਚ ਦਾਖ਼ਲ ਕਰਵਾਇਆ ਗਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਮਰਨ ਵਾਲਿਆਂ ‘ਚ ਅੰਜਨਾ (34), ਰਾਜਕੁਮਾਰ (65) ਅਤੇ ਰਾਮਕੁਮਾਰ ਯਾਦਵ (43) ਸ਼ਾਮਲ ਹਨ। ਇਸੇ ਤਰ੍ਹਾਂ ਸਤਨਾ ਜ਼ਿਲ੍ਹੇ ਦੇ ਜਟਵਾੜਾ ਇਲਾਕੇ ‘ਚ ਬਿਜਲੀ ਡਿੱਗਣ ਕਾਰਨ 65 ਸਾਲਾ ਇਤ ਔਰਤ ਚੰਦਰਾ ਦੀ ਮੌਤ ਹੋ ਗਈ। ਉਥੇ ਹੀ ਗੁਨਾ ਤੋਂ ਮਿਲੀ ਰਿਪੋਰਟ ਦੇ ਮੁਤਾਬਕ ਗੁਨਾ ਜ਼ਿਲੇ ਦੇ ਭੋਰਾ ਪਿੰਡ ‘ਚ ਬਿਜਲੀ ਡਿੱਗਣ ਕਾਰਨ 45 ਸਾਲਾ ਔਰਤ ਮਨੂ ਅਹਿਰਵਰ ਦੀ ਮੌਤ ਹੋ ਗਈ।
