ਲਾਸ ਏਂਜਲਸ ਦੀ ਇਕ ਅਦਾਲਤ ਨੇ ਇਕ ਮਹੀਨੇ ਤੱਕ ਚੱਲੇ ਮੁਕੱਦਮੇ ਤੋਂ ਬਾਅਦ ਹਾਲੀਵੁੱਡ ਫਿਲਮ ਨਿਰਮਾਤਾ ਹਾਰਵੇ ਵੀਨਸਟੀਨ ਨੂੰ ਇਕ ਔਰਤ ਨਾਲ ਜਬਰ-ਜ਼ਿਨਾਹ ਅਤੇ ਜਿਨਸੀ ਸ਼ੋਸ਼ਣ ਦਾ ਦੋਸ਼ੀ ਠਹਿਰਾਇਆ ਹੈ। ਜ਼ਿਕਰਯੋਗ ਹੈ ਕਿ ‘ਮੀਟੂ’ ਅੰਦੋਲਨ ਤਹਿਤ ਚਾਰ ਔਰਤਾਂ ਨੇ ਵੀਨਸਟੀਨ ‘ਤੇ ਉਨ੍ਹਾਂ ਦਾ ਜਿਨਸੀ ਸ਼ੋਸ਼ਣ ਦਾ ਦੋਸ਼ ਲਗਾਇਆ ਸੀ। ਵੀਨਸਟੀਨ ਨੂੰ ਕੈਲੀਫੋਰਨੀਆ ‘ਚ 24 ਸਾਲ ਦੀ ਕੈਦ ਦੀ ਸਜ਼ਾ ਹੋ ਸਕਦੀ ਹੈ। ਉਸ ਨੂੰ ਨਿਊਯਾਰਕ ‘ਚ ਜਬਰ-ਜ਼ਿਨਾਹ ਦੇ ਇਕ ਹੋਰ ਕੇਸ ‘ਚ 23 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ ਜਿਸ ਦੇ ਖ਼ਿਲਾਫ਼ ਉਸ ਨੇ ਅਪੀਲ ਕੀਤੀ ਹੋਈ ਹੈ। ਵੀਨਸਟੀਨ ਨੂੰ ਜਬਰ-ਜ਼ਿਨਾਹ, ਜ਼ਬਰਦਸਤੀ ਗੈਰ-ਕੁਦਰਤੀ ਜਿਨਸੀ ਸਬੰਧ ਬਣਾਉਣ ਅਤੇ ਜਿਨਸੀ ਦੁਰਵਿਹਾਰ ਦਾ ਦੋਸ਼ੀ ਪਾਇਆ ਗਿਆ ਹੈ। ਪੀੜਤਾ ਨੇ ਦੋਸ਼ ਲਾਇਆ ਸੀ ਕਿ 2013 ‘ਚ ਲਾਸ ਏਂਜਲਸ ਫਿਲਮ ਫੈਸਟੀਵਲ ਦੌਰਾਨ ਵੀਨਸਟੀਨ ਬਿਨਾਂ ਬੁਲਾਏ ਉਸ ਦੇ ਹੋਟਲ ਦੇ ਕਮਰੇ ‘ਚ ਦਾਖ਼ਲ ਹੋਇਆ ਸੀ। ਫੈਸਲੇ ਤੋਂ ਬਾਅਦ ਔਰਤ ਨੇ ਕਿਹਾ, ‘2013 ‘ਚ ਉਸ ਰਾਤ ਹਾਰਵੇ ਵੀਨਸਟੀਨ ਨੇ ਮੇਰੇ ਅੰਤਰ ਕੁਝ ਹਮੇਸ਼ਾ ਲਈ ਤਬਾਹ ਕਰ ਦਿੱਤਾ ਸੀ ਅਤੇ ਮੈਂ ਇਸਨੂੰ ਕਦੇ ਵਾਪਸ ਨਹੀਂ ਪਾ ਸਕਾਂਗੀ। ਅਪਰਾਧਿਕ ਮੁਕੱਦਮਾ ਬੇਰਹਿਮ ਸੀ ਅਤੇ ਵੀਨਸਟੀਨ ਦੇ ਵਕੀਲਾਂ ਨੇ ਮੈਨੂੰ ਅਦਾਲਤ ਦੇ ਕਮਰੇ ‘ਚ ਦੁਬਾਰਾ ਨਰਕ ਵਰਗਾ ਮਹਿਸੂਸ ਕਰਵਾਇਆ ਪਰ ਮੈਂ ਜਾਣਦੀ ਸੀ ਕਿ ਮੈਨੂੰ ਅੰਤ ਤੱਕ ਇਸ ਵਿੱਚੋਂ ਲੰਘਣਾ ਪਏਗਾ ਅਤੇ ਮੈਂ ਕੀਤਾ। ਮੈਂ ਉਮੀਦ ਕਰਦੀ ਹਾਂ ਕਿ ਵੀਨਸਟੀਨ ਆਪਣੀ ਜ਼ਿੰਦਗੀ ‘ਚ ਕਦੇ ਵੀ ਆਪਣੀ ਜੇਲ੍ਹ ਦੀ ਕੋਠੜੀ ਤੋਂ ਬਾਹਰ ਦੀ ਦੁਨੀਆ ਨਾ ਦੇਖ ਸਕੇ।’ ਵੀਨਸਟੀਨ ਸਜ਼ਾ ਸੁਣਾਏ ਜਾਣ ਦੇ ਸਮੇਂ ਮੇਜ਼ ਦੇ ਹੇਠਾਂ ਵੇਖਦਾ ਰਿਹਾ ਅਤੇ ਆਪਣੇ ਚਿਹਰੇ ‘ਤੇ ਹੱਥਾਂ ਨੂੰ ਰੱਖਦੇ ਨਜ਼ਰ ਆਇਆ।
