ਵਿਰਾਟ ਕੋਹਲੀ ਹੁਣ ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਇਕ ਹੋਰ ਇਤਿਹਾਸਕ ਉਪਲੱਬਧੀ ਹਾਸਲ ਕਰਦਿਆਂ ਸਭ ਤੋਂ ਤੇਜ਼ 25,000 ਦੌੜਾਂ ਬਣਾਉਣ ਵਾਲਾ ਬੱਲੇਬਾਜ਼ ਬਣ ਗਿਆ ਹੈ। ਉਸ ਨੇ ਇਹ ਉਪਲਬਧੀ ਨਵੀਂ ਦਿੱਲੀ ‘ਚ ਆਸਟਰੇਲੀਆ ਖ਼ਿਲਾਫ਼ ਦੂਜੇ ਟੈਸਟ ਦੇ ਤੀਜੇ ਦਿਨ ਹਾਸਲ ਕੀਤੀ। ਕੋਹਲੀ ਨੇ ਇਸ ਦੇ ਨਾਲ ਹੀ ਮਹਾਨ ਕ੍ਰਿਕਟਰ ਸਚਿਨ ਤੇਂਦੁਲਕਰ ਨੂੰ ਪਿੱਛੇ ਛੱਡ ਦਿੱਤਾ ਜਿਸ ਨੇ 577 ਪਾਰੀਆਂ ‘ਚ ਇਹ ਰਿਕਾਰਡ ਬਣਾਇਆ ਸੀ। ਜਦਕਿ ਵਿਰਾਟ ਨੇ 549 ਪਾਰੀਆਂ ‘ਚ ਅਜਿਹਾ ਕੀਤਾ ਹੈ। ਕੋਹਲੀ ਅਤੇ ਸਚਿਨ ਤੋਂ ਬਾਅਦ, ਰਿਕੀ ਪੋਂਟਿੰਗ (588), ਜੈਕ ਕੈਲਿਸ (594), ਕੁਮਾਰ ਸੰਗਾਕਾਰਾ (608) ਅਤੇ ਮਹੇਲਾ ਜੈਵਰਧਨੇ (701) ਇਹ ਉਪਲਬਧੀ ਹਾਸਲ ਕਰਨ ਵਾਲੇ ਸਭ ਤੋਂ ਤੇਜ਼ ਬੱਲੇਬਾਜ਼ ਹਨ। ਹੁਣ ਤੱਕ ਸਿਰਫ਼ 6 ਬੱਲੇਬਾਜ਼ ਹੀ 25,000 ਦੌੜਾਂ ਦੇ ਅੰਕੜੇ ਤੱਕ ਪਹੁੰਚ ਸਕੇ ਹਨ। ਕੋਹਲੀ ਨੇ 492 ਮੈਚਾਂ ਅਤੇ 549 ਪਾਰੀਆਂ ‘ਚ 53.55 ਦੀ ਔਸਤ ਨਾਲ 25,012 ਦੌੜਾਂ ਬਣਾਈਆਂ ਹਨ। ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਉਸਦੇ ਨਾਮ 74 ਸੈਂਕੜੇ ਅਤੇ 129 ਅਰਧ ਸੈਂਕੜੇ ਹਨ। ਉਸਨੇ ਹੁਣ ਤੱਕ 106 ਟੈਸਟ ਮੈਚ ਖੇਡੇ ਹਨ ਜਿਸ ‘ਚ 27 ਸੈਂਕੜੇ ਅਤੇ 28 ਅਰਧ ਸੈਂਕੜੇ ਦੀ ਮਦਦ ਨਾਲ 48.77 ਦੀ ਔਸਤ ਨਾਲ 8,195 ਦੌੜਾਂ ਬਣਾਈਆਂ ਹਨ। ਟੈਸਟ ਫਾਰਮੈਟ ‘ਚ ਉਸਦਾ ਸਰਵੋਤਮ ਸਕੋਰ 254 ਅਜੇਤੂ ਹੈ। ਵਨਡੇ ‘ਚ ਕੋਹਲੀ ਨੇ 271 ਮੈਚਾਂ ‘ਚ 57.69 ਦੀ ਔਸਤ ਨਾਲ 12,809 ਦੌੜਾਂ ਬਣਾਈਆਂ ਹਨ। ਉਨ੍ਹਾਂ ਨੇ ਵਨਡੇ ‘ਚ 46 ਸੈਂਕੜੇ ਅਤੇ 64 ਅਰਧ ਸੈਂਕੜੇ ਲਗਾਏ ਹਨ। ਵਨਡੇ ਫਾਰਮੈਟ ‘ਚ ਉਸਦਾ ਸਰਵੋਤਮ ਸਕੋਰ 183 ਦੌੜਾਂ ਹੈ। ਇਸ ਦੇ ਨਾਲ ਹੀ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਉਸ ਨੇ 52.73 ਦੀ ਔਸਤ ਨਾਲ 4,008 ਦੌੜਾਂ ਬਣਾਈਆਂ ਹਨ। ਉਸ ਨੇ ਟੀ-20 ਫਾਰਮੈਟ ‘ਚ ਇਕ ਸੈਂਕੜਾ ਅਤੇ 37 ਅਰਧ ਸੈਂਕੜੇ ਲਗਾਏ ਹਨ।
