ਵਰਲਡ ਬੈਡਮਿੰਟਨ ਫੈਡਰੇਸ਼ਨ ਵੱਲੋਂ ਜਾਰੀ ਦਰਜਾਬੰਦੀ ‘ਚ ਇੰਡੀਆ ਦੀ ਸਟਾਰ ਬੈਡਮਿੰਟਨ ਖਿਡਾਰਨ ਪੀ.ਵੀ. ਸਿੰਧੂ ਸਿਖਰਲੀਆਂ 10 ਖਿਡਾਰਨਾਂ ‘ਚੋਂ ਬਾਹਰ ਹੋ ਗਈ ਹੈ। ਉਹ ਪਿਛਲੇ ਹਫ਼ਤੇ ਮਹਿਲਾ ਸਿੰਗਲਜ਼ ਵਰਗ ‘ਚ ਆਪਣਾ ਸਵਿਸ ਓਪਨ ਖ਼ਿਤਾਬ ਬਚਾਉਣ ‘ਚ ਨਾਕਾਮ ਰਹੀ ਸੀ। ਨਵੀਂ ਦਰਜਾਬੰਦੀ ਮੁਤਾਬਕ ਸਿੰਧੂ, ਜਿਸ ਨੂੰ ਸੱਟ ਤੋਂ ਬਾਅਦ ਲੈਅ ‘ਚ ਆਉਣ ਲਈ ਇਸ ਸੀਜ਼ਨ ‘ਚ ਸੰਘਰਸ਼ ਕਰਨਾ ਪੈ ਰਿਹਾ ਹੈ, ਦੋ ਸਥਾਨ ਹੇਠਾਂ ਖਿਸਕ ਕੇ 60,448 ਅੰਕਾਂ ਨਾਲ 11ਵੇਂ ਸਥਾਨ ‘ਤੇ ਚਲੀ ਗਈ ਹੈ। ਸਾਬਕਾ ਵਿਸ਼ਵ ਚੈਂਪੀਅਨ ਸਿੰਧੂ ਨਵੰਬਰ 2013 ਤੋਂ ਚੋਟੀ ਦੀਆਂ 10 ਖਿਡਾਰਨਾਂ ‘ਚ ਸ਼ੁਮਾਰ ਸੀ। ਕਰੀਅਰ ਦੌਰਾਨ ਉਹ ਵਿਸ਼ਵ ਦਰਜਾਬੰਦੀ ‘ਚ ਦੂਜੇ ਸਥਾਨ ‘ਤੇ ਵੀ ਰਹੀ। ਦੂਜੇ ਪਾਸੇ ਪੁਰਸ਼ ਸਿੰਗਲਜ਼ ਦਰਜਾਬੰਦੀ ‘ਚ ਐੱਚ.ਐੱਸ. ਪ੍ਰਣੌਏ 8ਵੇਂ ਨੰਬਰ ‘ਤੇ ਹੈ ਅਤੇ ਕਿਦਾਂਬੀ ਸ੍ਰੀਕਾਂਤ ਖਿਸਕ ਕੇ 21ਵੇਂ ਅਤੇ ਲਕਸ਼ੈ ਸੇਨ 25ਵੇਂ ਸਥਾਨ ‘ਤੇ ਚਲਾ ਗਿਆ ਹੈ। ਸਵਿਸ ਓਪਨ ਚੈਂਪੀਅਨ ਸਤਵਿਕਸਾਈਰਾਜ ਰੰਕੀਰੈੱਡੀ ਅਤੇ ਚਿਰਾਗ ਸ਼ੈੱਟੀ ਦੀ ਜੋੜੀ ਨੇ 6ਵੇਂ ਨੰਬਰ ‘ਤੇ ਆਪਣੀ ਸਥਿਤੀ ਹੋਰ ਮਜ਼ਬੂਤ ਕਰ ਲਈ ਹੈ ਜਦਕਿ ਮਹਿਲਾ ਡਬਲਜ਼ ‘ਚ ਟਰੈਸਾ ਜੌਲੀ ਅਤੇ ਗਾਇਤਰੀ ਗੋਪੀਚੰਦ ਦੀ ਜੋੜੀ 18ਵੇਂ ਸਥਾਨ ‘ਤੇ ਬਰਕਰਾਰ ਹੈ।
