ਕਾਮਨਵੈਲਥ ਗੇਮਜ਼ ‘ਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਪ੍ਰਭਾਵਿਤ ਕਰਨ ਵਾਲੇ ਨੌਜਵਾਨ ਫਾਰਵਰਡ ਅਭਿਸ਼ੇਕ ਨੇ ਕਿਹਾ ਕਿ ਭਾਰਤੀ ਟੀਮ ਦਾ ਟੀਚਾ ਅਗਲੇ ਸਾਲ ਹੋਣ ਵਾਲੇ ਵਿਸ਼ਵ ਕੱਪ ਤੋਂ ਪਹਿਲਾਂ ਆਪਣੀ ਸਰਵਸ੍ਰੇਸ਼ਠ ਫਾਰਮ ਬਰਕਰਾਰ ਰੱਖਣਾ ਹੈ। ਬਰਮਿੰਘਮ ‘ਚ 6 ਮੈਚਾਂ ‘ਚ 2 ਗੋਲ ਕਰਨ ਵਾਲੇ ਅਭਿਸ਼ੇਕ ਨੇ ਕਿਹਾ ਕਿ ਅਸੀਂ ਸਾਰੇ ਅਸਲ ‘ਚ ਅਭਿਆਸ ‘ਚ ਵਾਪਸੀ ਕਰਨ ਅਤੇ ਆਗਾਮੀ ਪ੍ਰਤੀਯੋਗਿਤਾਵਾਂ ਲਈ ਖੁਦ ਨੂੰ ਤਿਆਰ ਕਰਨ ਲਈ ਉਤਸ਼ਾਹਿਤ ਹਾਂ। ਉਸ ਨੇ ਕਿਹਾ, ‘ਅਸੀਂ ਸਾਰੇ ਇਕ ਟੀਮ ਦੇ ਰੂਪ ਵਿਚ ਸੁਧਾਰ ਕਰਨਾ ਚਾਹੁੰਦੇ ਹਾਂ।’ ਰਾਸ਼ਟਰਮੰਡਲ ਖੇਡਾਂ ‘ਚ ਇਹ 22 ਸਾਲਾ ਖਿਡਾਰੀ ਸਾਰੇ ਛੇ ਮੈਚਾਂ ‘ਚ ਖੇਡਿਆ ਸੀ ਤੇ ਉਸ ਨੇ ਭਾਰਤ ਨੂੰ ਚਾਂਦੀ ਤਮਗਾ ਦਿਵਾਉਣ ‘ਚ ਅਹਿਮ ਭੂਮਿਕਾ ਨਿਭਾਈ ਸੀ। ਭਾਰਤੀ ਟੀਮ ਫਾਈਨਲ ‘ਚ ਆਸਟਰੇਲੀਆ ਹੱਥੋਂ ਹਾਰ ਗਈ ਸੀ। ਅਭਿਸ਼ੇਕ ਨੇ ਕਿਹਾ, ‘ਇੰਨੇ ਵੱਡੇ ਮੰਚ ‘ਤੇ ਚੰਗਾ ਪ੍ਰਦਰਸ਼ਨ ਕਰਨਾ ਮੇਰੇ ਲਈ ਯਾਦਗਾਰ ਤਜਰਬਾ ਰਿਹਾ। ਇਸ ਟੂਰਨਾਮੈਂਟ ਦੌਰਾਨ ਮੈਨੂੰ ਆਪਣੀ ਖੇਡ ਦੇ ਬਾਰੇ ‘ਚ ਕਾਫੀ ਕੁਝ ਸਿੱਖਣ ਨੂੰ ਮਿਲਿਆ ਤੇ ਪਤਾ ਲੱਗਾ ਕਿਹੜੇ ਖੇਤਰਾਂ ‘ਚ ਮੈਨੂੰ ਸੁਧਾਰ ਕਰਨ ਦੀ ਲੋੜ ਹੈ।’ ਉਸ ਨੇ ਕਿਹਾ, ‘ਅਸੀਂ ਪੂਰੀ ਪ੍ਰਤੀਯੋਗਿਤਾ ‘ਚ ਇਕ ਟੀਮ ਦੇ ਰੂਪ ‘ਚ ਚੰਗਾ ਪ੍ਰਦਰਸ਼ਨ ਕੀਤਾ ਜਦਕਿ ਸਾਡਾ ਸਾਹਮਣਾ ਸਖਤ ਵਿਰੋਧੀਆਂ ਨਾਲ ਸੀ। ਹਰੇਕ ਮੈਚ ਸਾਡੇ ਲਈ ਇਕ ਚੁਣੌਤੀ ਸੀ ਤੇ ਅਸੀਂ ਇਸਦਾ ਡਟ ਕੇ ਸਾਹਮਣਾ ਕੀਤਾ। ਆਸਟਰੇਲੀਆ ਵਿਰੁੱਧ ਫਾਈਨਲ ‘ਚ ਭਾਵੇਂ ਹੀ ਸਾਨੂੰ ਜਿੱਤ ਨਹੀਂ ਮਿਲੀ ਪਰ ਅਸੀਂ ਉਸ ਤੋਂ ਕਾਫੀ ਕੁਝ ਸਿੱਖਿਆ। ਅਸੀਂ ਇਨ੍ਹਾਂ ਖੇਤਰਾਂ ਵਿਚ ਅਭਿਆਸ ਦੌਰਾਨ ਸੁਧਾਰ ਕਰਾਂਗੇ।’
