ਇਕ ਪੰਜਾਬੀ ਸਿੱਖ ਨੌਜਵਾਨ ਰਣਦੀਪ ਸਿੰਘ ਹੋਠੀ ਨੂੰ ਟੈਸਲਾ ਦੇ ਸੀ.ਈ.ਓ. ਏਲਨ ਮਸਕ ਨੇ 10 ਹਜ਼ਾਰ ਡਾਲਰ ਦਾ ਭੁਗਤਾਨ ਕਰਕੇ ਖਹਿੜਾ ਛੁਡਾਇਆ ਹੈ। ਮਸਕ ਆਲੋਚਕ ਅਤੇ ਸੁਤੰਤਰ ਖੋਜਕਰਤਾ ਇੰਡੋ-ਅਮਰੀਕਨ ਸਿੱਖ ਰਣਦੀਪ ਹੋਠੀ ਦੁਆਰਾ ਆਪਣੇ ਵਿਰੁੱਧ ਦਾਇਰ ਕੀਤੇ ਗਏ ਮਾਣਹਾਨੀ ਦੇ ਕੇਸ ਨੂੰ ਨਿਪਟਾਉਣ ਲਈ 10,000 ਦਾ ਭੁਗਤਾਨ ਕਰਨ ਲਈ ਸਹਿਮਤੀ ਹੋ ਗਏ ਹਨ। ਮਿਸ਼ੀਗਨ ਯੂਨੀਵਰਸਿਟੀ ‘ਚ ਏਸ਼ੀਅਨ ਭਾਸ਼ਾਵਾਂ ਅਤੇ ਸਭਿਆਚਾਰਾਂ ‘ਚ ਡਾਕਟਰੇਟ ਦੇ ਵਿਦਿਆਰਥੀ ਹੋਠੀ ਨੇ 2020 ‘ਚ ਮਸਕ ਖ਼ਿਲਾਫ਼ ਮਾਣਹਾਨੀ ਦਾ ਕੇਸ ਦਾਇਰ ਕੀਤਾ ਸੀ। ਉਸ ਨੇ ਦੋਸ਼ ਲਾਇਆ ਕਿ ਅਰਬਪਤੀ ਕਾਰੋਬਾਰੀ ਨੇ ਉਸ ‘ਤੇ ਟੈਸਲਾ ਦੇ ਕਰਮਚਾਰੀਆਂ ਨੂੰ ਸਰਗਰਮੀ ਨਾਲ ਪ੍ਰੇਸ਼ਾਨ ਕਰਨ ਅਤੇ ਲਗਭਗ ਕਤਲ ਕਰਨ ਦਾ ਝੂਠਾ ਦੋਸ਼ ਲਗਾਇਆ ਸੀ। ਮਾਰਚ 2023 ‘ਚ, ਇਕ ਲੰਬੀ ਲੜਾਈ ਤੋਂ ਬਾਅਦ, ਮਸਕ ਨੇ ਹੋਠੀ ਨੂੰ ਮਾਮਲਾ ਸੁਲਝਾਉਣ ਲਈ ਕਿਹਾ। ਇਕ ਬਿਆਨ ‘ਚ, ਹੋਠੀ ਨੇ ਮਸਕ ਦੀ ਸੁਲ੍ਹਾ-ਸਫਾਈ ਦੀ ਪੇਸ਼ਕਸ਼ ਨੂੰ ਸਵੀਕਾਰ ਕਰਨ ਦਾ ਐਲਾਨ ਕਰਦੇ ਹੋਏ ਕਿਹਾ ਕਿ ਮਾਮਲਾ ਪ੍ਰਸਿੱਧੀ ਜਾਂ ਪੈਸੇ ਦੀ ਮੰਗ ਬਾਰੇ ਨਹੀਂ ਸੀ। ਸਟੈਂਡ ਲੈਣ ਬਾਰੇ ਸੀ। ਮੈਂ ਠੀਕ ਮਹਿਸੂਸ ਕਰ ਰਿਹਾ ਹਾਂ। ਉਨ੍ਹਾਂ ਕਿਹਾ ਕਿ ਮੈਂ ਇਹ ਕੇਸ ਆਪਣੇ ਕੰਮ ਦਾ ਬਚਾਅ ਕਰਨ, ਆਪਣਾ ਨਾਮ ਪਾਕ-ਸਾਫ਼ ਕਰਨ ਅਤੇ ਇਕ ਸੰਦੇਸ਼ ਦੇਣ ਲਈ ਲਿਆ ਸੀ। ਮੈਨੂੰ ਵਿਸ਼ਵਾਸ ਹੈ ਕਿ ਮੈਂ ਇਸਨੂੰ ਪੂਰਾ ਕਰ ਲਿਆ ਹੈ। ਮਸਕ ਦਾ ਬਹੁਤ ਧੰਨਵਾਦ। ਪਿਛਲੇ ਇਕ ਸਾਲ ਦੇ ਉਸ ਦੇ ਵਿਹਾਰ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਉਸ ਨੂੰ ਆਪਣੀ ਹਰ ਗੱਲ ਅਤੇ ਹਰ ਕਾਰਵਾਈ ਦੀ ਸਮੀਖਿਆ ਕਰਨ ਦੀ ਲੋੜ ਹੈ। ਹੋਠੀ ਦੇ ਵਕੀਲਾਂ ‘ਚੋਂ ਇਕ ਡੀ. ਗਿੱਲ ਸਪੇਲਿਨ ਨੇ ਕਿਹਾ ਕਿ ਪਿਛਲੇ ਸਾਲ ਮਸਕ ਨੇ ਕਿਹਾ ਸੀ ਕਿ ਉਹ ਕਦੇ ਵੀ ਬੇਇਨਸਾਫ਼ੀ ਵਾਲੇ ਕੇਸ ਦਾ ਨਿਪਟਾਰਾ ਨਹੀਂ ਕਰਨਗੇ। ਫਿਰ ਵੀ ਉਨ੍ਹਾਂ ਨੇ ਹੋਠੀ ਨੂੰ ਅਜਿਹਾ ਮਾਮਲਾ ਸੁਲਝਾਉਣ ਲਈ ਕਿਹਾ ਹੈ। ਅਸੀਂ ਮਸਕ ਦੀ ਦੇਰੀ ਨਾਲ ਸਵੀਕਾਰ ਕੀਤੇ ਜਾਣ ਦਾ ਸਵਾਗਤ ਕਰਦੇ ਹਾਂ ਕਿ ਇਹ ਮਾਮਲਾ ਜਾਇਜ਼ ਸੀ। ਟੈਸਲਾ ਨਾਲ ਹੋਠੀ ਦਾ ਸਾਹਮਣਾ ਉਦੋਂ ਹੋਇਆ ਜਦੋਂ ਉਸਨੇ ਟਵਿਟਰ ‘ਤੇ ਅਕਾਊਂਟ ਬਣਾਇਆ ਅਤੇ ਇਲੈਕਟ੍ਰਿਕ ਵਾਹਨ ਨਿਰਮਾਤਾ ਦੇ ਆਟੋਮੇਸ਼ਨ, ਤਕਨਾਲੋਜੀ ਅਤੇ ਉਤਪਾਦਨ ਪ੍ਰਕਿਰਿਆਵਾਂ ਬਾਰੇ ਮਸਕ ਅਤੇ ਉਸਦੀ ਕੰਪਨੀ ਦੁਆਰਾ ਪ੍ਰਕਾਸ਼ਿਤ ਕੀਤੇ ਗਏ ਦਾਅਵਿਆਂ ਬਾਰੇ ਫੈਕਟ ਚੈੱਕ ਕੀਤੇ। ਹੋਠੀ ਨੇ 2018 ਦੇ ਸ਼ੁਰੂ ‘ਚ ਟੈਸਲਾ ਦੀ ਕੈਲੀਫੋਰਨੀਆ ਫੈਕਟਰੀ ‘ਚ ਇਕ ਸੋਸ਼ਲ ਵਰਕਰ ਵਜੋਂ ਉਤਪਾਦਨ ਪ੍ਰਕਿਰਿਆ ਨੂੰ ਦੇਖਿਆ ਸੀ। ਅਪ੍ਰੈਲ 2019 ‘ਚ, ਟੈਸਲਾ ਨੇ ਹੋਠੀ ਦੇ ਖ਼ਿਲਾਫ਼ ਇਕ ਰੋਕ ਲਗਾਉਣ ਦੇ ਆਦੇਸ਼ ਦੀ ਮੰਗ ਕੀਤੀ। ਉਸਨੇ ਦੋਸ਼ ਲਾਇਆ ਕਿ ਹੋਠੀ ਨੇ ਟੈਸਲਾ ਫੈਕਟਰੀ ਦੀ ਪਾਰਕਿੰਗ ‘ਚ ਆਪਣੀ ਕਾਰ ਨਾਲ ਇਕ ਕਰਮਚਾਰੀ ਨੂੰ ਮਾਰਿਆ। ਹੋਠੀ ਨੇ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਜ ਕਰ ਦਿੱਤਾ। ਜਦੋਂ ਹੋਠੀ ਅਤੇ ਉਸਦੀ ਕਾਨੂੰਨੀ ਟੀਮ ਨੇ ਕਥਿਤ ਟੱਕਰ ਦੀ ਵੀਡੀਓ ਸੌਂਪਣ ਲਈ ਟੈਸਲਾ ਦੇ ਵਿਰੁੱਧ ਅਦਾਲਤੀ ਆਦੇਸ਼ ਪ੍ਰਾਪਤ ਕੀਤਾ ਤਾਂ ਟੈਸਲਾ ਨੇ ਜੁਲਾਈ 2019 ‘ਚ ਅਚਾਨਕ ਆਪਣਾ ਮੁਕੱਦਮਾ ਵਾਪਸ ਲੈ ਲਿਆ। ਇਸ ਤੋਂ ਬਾਅਦ ਅਗਲੇ ਮਹੀਨੇ ਮਸਕ ਨੇ ਹੋਠੀ ‘ਤੇ ਸਰਗਰਮ ਰੂਪ ਨਾਲ ਪ੍ਰੇਸ਼ਾਨ ਕਰਨ ਅਤੇ ਟੈਸਲਾ ਦੇ ਕਰਮਚਾਰੀਆਂ ਨੂੰ ਲਗਭਗ ਕਤਲ ਕਰਨ ਦਾ ਦੋਸ਼ ਲਗਾਉਂਦੇ ਹੋਏ ਇਕ ਰਿਪੋਰਟਰ ਨੂੰ ਈ-ਮੇਲ ਕੀਤਾ। ਉਸ ਟਿੱਪਣੀ ਨੂੰ ਬਾਅਦ ਵਿਚ ਪ੍ਰਕਾਸ਼ਿਤ ਕੀਤਾ ਗਿਆ ਸੀ ਅਤੇ ਟਵਿੱਟਰ ‘ਤੇ ਸੈਂਕੜੇ ਹਜ਼ਾਰਾਂ ਲੋਕਾਂ ਨੂੰ ਵੰਡਿਆ ਗਿਆ ਸੀ। ਮਸਕ ਦੇ ਦੋਸ਼ਾਂ ਦੇ ਵਿਸਲਬਲੋਅਰਜ਼, ਖੋਜਕਤਾਵਾਂ, ਪੱਤਰਕਾਰਾਂ ਅਤੇ ਆਲੋਚਕਾਂ ਸਣੇ ਹਰ ਵਰਗ ਤੋਂ ਹੋਠੀ ਨੂੰ ਸਮਰਥਨ ਮਿਲਣ ਲੱਗਾ।
