ਵਿਸ਼ਵ ਚੈਂਪੀਅਨ ਨਿਖਤ ਜ਼ਰੀਨ ਅਤੇ ਮੌਜੂਦਾ ਓਲੰਪਿਕਸ ’ਚ ਕਾਂਸੇ ਦਾ ਤਗ਼ਮਾ ਜੇਤੂ ਲਵਲੀਨਾ ਬੋਰਗੋਹੇਨ ਨੂੰ ਰਾਸ਼ਟਰਮੰਡਲ ਖੇਡਾਂ ਦੇ ਮਹਿਲਾ ਮੁੱਕੇਬਾਜ਼ੀ ਮੁਕਾਬਲੇ ’ਚ ਆਸਾਨ ਡਰਾਅ ਮਿਲਿਆ ਹੈ। ਨਿਖਤ ਮਹਿਲਾਵਾਂ ਦੇ 48-50 ਕਿਲੋਗ੍ਰਾਮ ਲਾਈਟ ਫਲਾਈਵੇਟ ਵਰਗ ’ਚ ਐਤਵਾਰ ਨੂੰ ਮੋਜ਼ੰਬੀਕ ਦੀ ਹੇਲੇਨਾ ਇਸਮਾਈਲ ਬਾਗਾਓਂ ਦਾ ਮੁਕਾਬਲਾ ਕਰੇਗੀ। ਇਹ ਮੁਕਾਬਲਾ ਜਿੱਤਣ ਮਗਰੋਂ ਹੀ ਉਹ ਕੁਆਰਟਰਫਾਈਨਲ ’ਚ ਇਕ ਹੋਰ ਆਸਾਨ ਵਿਰੋਧੀ ਵੇਲਸ ਦੀ ਹੇਲੇਨ ਜੋਨਸ ਖ਼ਿਲਾਫ਼ ਰਿੰਗ ਵਿੱਚ ਉੱਤਰੇਗੀ। ਲਵਲੀਨਾ ਲਾਈਟ ਮਿਡਲ ਵੇਟ (60-70 ਕਿਲੋਗ੍ਰਾਮ) ਵਰਗ ’ਚ ਸ਼ਨਿਚਰਵਾਰ ਨੂੰ ਨਿਊਜ਼ੀਲੈਂਡ ਦੀ ਅਰਿਆਨੇ ਨਿਕੋਲਸਨ ਦਾ ਸਾਹਮਣਾ ਕਰੇਗੀ ਅਤੇ ਜਿੱਤਣ ਮਗਰੋਂ ਉਹ ਕੁਆਰਟਰਫਾਈਨਲ ’ਚ ਗੋਲਡ ਕੋਸਟ ਦੀ ਚਾਂਦੀ ਦਾ ਤਗ਼ਮਾ ਜੇਤੂੁ ਵੇਲਸ ਦੀ ਰੋਜ਼ੀ ਅਸੇਲਸ ਨਾਲ ਮੁਕਾਬਲਾ ਕਰੇਗੀ। ਲਾਈਟਵੇਟ (57-60 ਕਿਲੋਗ੍ਰਾਮ) ਵਰਗ ’ਚ ਜੈਸਮੀਨ ਨੂੰ ਪਹਿਲੇ ਦੌਰ ’ਚ ਬਾਈ ਮਿਲੀ ਹੈ, ਜਿਸ ਨਾਲ ਉਹ ਸਿੱਧਾ ਕੁਆਟਰਫਾਈਨਲ ’ਚ ਹੀ ਰਿੰਗ ’ਚ ਉੱਤਰੇਗੀ। ਮਹਿਲਾਵਾਂ ਦੇ ਘੱਟੋ-ਘੱਟ 45-48 ਕਿਲੋ ਭਾਰ ਵਰਗ ’ਚ ਨੀਤੂ ਨੂੰ ਤਗ਼ਮਾ ਪੱਕਾ ਕਰਨ ਲਈ ਸਿਰਫ਼ ਇਕ ਜਿੱਤ ਦਰਜ ਕਰਨ ਦੀ ਲੋਡ਼ ਹੈ। ਉਹ ਤਿੰਨ ਅਗਸਤ ਨੂੰ ਕੁਆਰਟਰਫਾਈਨਲ ’ਚ ਉੱਤਰੀ ਆਇਰਲੈਂਡ ਦੀ ਨਿਕੋਲ ਕਲਾਇਫ ਦਾ ਸਾਹਮਣਾ ਕਰੇਗੀ।
