ਹੋਟਲ ਦੇ ਕਮਰੇ ‘ਚ ਖੇਡ ਰਹੀ ਭਾਰਤੀ ਮੂਲ ਦੀ ਪੰਜ ਸਾਲਾ ਬੱਚੀ ਦੀ ਮੌਤ ਦੇ ਮਾਮਲੇ ‘ਚ 35 ਸਾਲਾ ਜੋਸਫ਼ ਲੀ ਸਮਿਥ ਨਾਂ ਦੇ ਵਿਅਕਤੀ ਨੂੰ ਸੌ ਸਾਲ ਸਖਤ ਸਜ਼ਾ ਸੁਣਾਈ ਗਈ ਹੈ ਜਿਸ ਦੀ ਬੰਦੂਕ ‘ਚੋਂ ਗੋਲੀ ਨਿਸ਼ਾਨੇ ਤੋਂ ਖੁੰਝ ਕੇ ਇਸ ਬੱਚੀ ਦੇ ਲੱਗ ਗਈ ਸੀ। ਦੋ ਸਾਲ ਪੁਰਾਣੇ 2021 ਦੇ ਇਸ ਮਾਮਲੇ ‘ਚ ਮਯਾ ਪਟੇਲ ਨਾਂ ਦੀ ਬੱਚੀ ਦੀ ਮੌਤ ਹੋਈ ਸੀ। ਸਜ਼ਾ ਦਾ ਐਲਾਨ ਲੁਈਸਿਆਨਾ ਦੇ ਕੈਡੋ ਪੈਰਿਸ਼ ‘ਚ ਇਕ ਜੱਜ ਦੁਆਰਾ ਕੀਤਾ ਗਿਆ। ਮੀਡੀਆ ਰਿਪੋਰਟਾਂ ‘ਚ ਕਿਹਾ ਗਿਆ ਕਿ ਮਯਾ ਪਟੇਲ ਮਾਰਚ 2021 ‘ਚ ਸ਼੍ਰੇਵਪੋਰਟ ਦੇ ਮੌਂਕਹਾਊਸ ਡਰਾਈਵ ‘ਚ ਆਪਣੇ ਹੋਟਲ ਦੇ ਕਮਰੇ ‘ਚ ਖੇਡ ਰਹੀ ਸੀ ਜਦੋਂ ਜੋਸਫ਼ ਲੀ ਸਮਿਥ ਦੀ ਬੰਦੂਕ ਵਿੱਚੋਂ ਨਿਕਲੀ ਗੋਲੀ ਨਿਸ਼ਾਨੇ ਤੋਂ ਖੁੰਝ ਗਈ ਅਤੇ ਉਸ ਨੂੰ ਜਾ ਲੱਗੀ। ਕੈਡੋ ਪੈਰਿਸ਼ ਜ਼ਿਲ੍ਹਾ ਅਟਾਰਨੀ ਦੇ ਦਫ਼ਤਰ ਨੇ ਇਸ ਹਫ਼ਤੇ ਐਲਾਨ ਕੀਤਾ ਕਿ ਸਮਿਥ ਨੂੰ ਮਾਰਚ 2021 ‘ਚ ਮਯਾ ਪਟੇਲ ਦੇ ਕਤਲ ਦੇ ਸਬੰਧ ‘ਚ ਜ਼ਿਲ੍ਹਾ ਜੱਜ ਜੌਨ ਡੀ. ਮੋਸੇਲੀ ਜੂਨੀਅਰ ਨੇ ਪ੍ਰੋਬੇਸ਼ਨ, ਪੈਰੋਲ ਜਾਂ ਸਜ਼ਾ ‘ਚ ਕਮੀ ਦੇ ਲਾਭ ਤੋਂ ਬਿਨਾਂ 60 ਸਾਲ ਦੀ ਸਖ਼ਤ ਮਿਹਨਤ ਦੀ ਸਜ਼ਾ ਸੁਣਾਈ। ਜੱਜ ਨੇ ਇਹ ਵੀ ਹੁਕਮ ਦਿੱਤਾ ਕਿ ਸਮਿਥ, ਜਿਸ ਨੂੰ ਇਸ ਸਾਲ ਜਨਵਰੀ ‘ਚ ਕਤਲੇਆਮ ਦਾ ਦੋਸ਼ੀ ਪਾਇਆ ਗਿਆ ਸੀ, ਨੂੰ ਮਯਾ ਦੇ ਕਤਲ ਨਾਲ ਜੁੜੇ ਵੱਖ-ਵੱਖ ਦੋਸ਼ਾਂ ਲਈ ਨਿਆਂ ‘ਚ ਰੁਕਾਵਟ ਪਾਉਣ ਲਈ 20-20 ਸਾਲ ਦੀ ਸਜ਼ਾ ਭੁਗਤਣੀ ਪਵੇਗੀ। ਇਨ੍ਹਾਂ ਸ਼ਰਤਾਂ ਨੂੰ ਪ੍ਰੋਬੇਸ਼ਨ, ਪੈਰੋਲ ਜਾਂ ਸਜ਼ਾ ਦੀ ਕਮੀ ਤੋਂ ਬਿਨਾਂ ਸਖ਼ਤ ਮਿਹਨਤ ਨਾਲ ਵੀ ਪੂਰਾ ਕੀਤਾ ਜਾਣਾ ਚਾਹੀਦਾ ਹੈ। ਜ਼ਿਕਰਯੋਗ ਹੈ ਕਿ 20 ਮਾਰਚ 2021 ਨੂੰ ਪੱਛਮੀ ਸ਼ਰੇਵਪੋਰਟ ‘ਚ ਮੋਨਕਹਾਊਸ ਡ੍ਰਾਈਵ ਦੇ 4900 ਬਲਾਕ ‘ਚ ਸੁਪਰ 8 ਮੋਟਲ ਦੀ ਪਾਰਕਿੰਗ ‘ਚ ਸਮਿਥ ਦਾ ਇਕ ਹੋਰ ਆਦਮੀ ਨਾਲ ਝਗੜਾ ਹੋ ਗਿਆ। ਉਸ ਸਮੇਂ ਮੋਟਲ ਦੀ ਮਲਕੀਅਤ ਅਤੇ ਸੰਚਾਲਨ ਵਿਮਲ ਅਤੇ ਸਨੇਹਲ ਪਟੇਲ ਕੋਲ ਸੀ, ਜੋ ਮਯਾ ਅਤੇ ਇਕ ਛੋਟੇ ਭੈਣ-ਭਰਾ ਨਾਲ ਜ਼ਮੀਨੀ ਮੰਜ਼ਿਲ ਦੀ ਇਕਾਈ ‘ਚ ਰਹਿੰਦੇ ਸਨ। ਝਗੜੇ ਦੌਰਾਨ ਸਮਿਥ ਨੇ ਦੂਜੇ ਆਦਮੀ ਨੂੰ 9-ਐੱਮ.ਐੱਮ. ਹੈਂਡਗਨ ਨਾਲ ਮਾਰਿਆ ਜਿਸ ‘ਚੋਂ ਇਕ ਗੋਲੀ ਨਿਕਲੀ। ਗੋਲੀ ਨਿਸ਼ਾਨੇ ਤੋਂ ਖੁੰਝ ਗਈ ਪਰ ਅਪਾਰਟਮੈਂਟ ‘ਚ ਦਾਖਲ ਹੋ ਕੇ ਮਯਾ ਦੇ ਸਿਰ ‘ਚ ਲੱਗੀ। ਮਯਾ ਨੂੰ ਨੇੜਲੇ ਹਸਪਤਾਲ ਲਿਜਾਇਆ ਗਿਆ ਜਿੱਥੇ 23 ਮਾਰਚ ਨੂੰ ਮ੍ਰਿਤਕ ਘੋਸ਼ਿਤ ਕਰਨ ਤੋਂ ਪਹਿਲਾਂ ਉਹ ਤਿੰਨ ਦਿਨ ਤੱਕ ਜ਼ਿੰਦਗੀ ਨਾਲ ਜੂਝਦੀ ਰਹੀ।
