ਕੰਜ਼ਰਵੇਟਿਵ ਪਾਰਟੀ ਦੇ ਨਵੇਂ ਆਗੂ ਤੇ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਦੀ ਦੌੜ ‘ਚ ਭਾਰਤੀ ਮੂਲ ਦੇ ਰਿਸ਼ੀ ਸੂਨਕ ਅਤੇ ਵਿਦੇਸ਼ ਮੰਤਰੀ ਲਿਜ਼ ਟਰੱਸ ਹਨ। ਦੋਹਾਂ ਦਾ ਆਪਸ ‘ਚ ਸਿੱਧਾ ਮੁਕਾਬਲਾ ਹੈ। ਸੂਨਕ ਵੀ ਪਹਿਲਾਂ ਮੰਤਰੀ ਸਨ ਪਰ ਉਨ੍ਹਾਂ ਬੋਰਿਸ ਜੌਹਨਸਨ ਦੀ ਕੈਬਨਿਟ ‘ਚੋਂ ਅਸਤੀਫਾ ਦੇ ਦਿੱਤਾ ਸੀ। ਸੂਨਕ ਤੇ ਲਿਜ਼ ‘ਚੋਂ ਕਿਸੇ ਇਕ ਨੇ ਪ੍ਰਧਾਨ ਮੰਤਰੀ ਚੁਣਿਆ ਜਾਣਾ ਹੈ। ਪ੍ਰਧਾਨ ਮੰਤਰੀ ਦੀ ਚੋਣ ਲਈ ਵੋਟਿੰਗ ਦਾ ਅਮਲ ਅੱਜ ਖ਼ਤਮ ਹੋ ਗਿਆ ਅਤੇ ਪ੍ਰਧਾਨ ਮੰਤਰੀ ਦੇ ਨਾਂ ਦਾ ਐਲਾਨ 5 ਸਤੰਬਰ ਨੂੰ ਕੀਤਾ ਜਾਣਾ ਹੈ। ਰਿਸ਼ੀ ਸੂਨਕ ਨੇ ਇਸ ਤੋਂ ਪਹਿਲਾਂ ਆਪਣੇ ਮਾਤਾ-ਪਿਤਾ ਤੇ ਪਤਨੀ ਅਕਸ਼ਤਾ ਮੂਰਤੀ ਵੱਲੋਂ ਮਿਲੀ ਹਮਾਇਤ ਲਈ ਉਨ੍ਹਾਂ ਦਾ ਧੰਨਵਾਦ ਕਰਦਿਆਂ ਆਪਣੀ ਚੋਣ ਮੁਹਿੰਮ ਸਮਾਪਤ ਕੀਤੀ। ਟੋਰੀ ਮੈਂਬਰਾਂ ਵੱਲੋਂ ਵੋਟ ਪਾਉਣ ਦਾ ਅਮਲ ਸ਼ੁੱਕਰਵਾਰ ਸ਼ਾਮ ਨੂੰ ਖ਼ਤਮ ਹੋ ਗਿਆ। ਵੋਟਾਂ ਦੀ ਗਿਣਤੀ ਮਗਰੋਂ ਨਵੇਂ ਬਰਤਾਨਵੀ ਪ੍ਰਧਾਨ ਮੰਤਰੀ ਦੇ ਨਾਂ ਦਾ ਐਲਾਨ 5 ਸਤੰਬਰ ਨੂੰ ਹੋਵੇਗਾ, ਜਦੋਂਕਿ ਹਲਫ਼ਦਾਰੀ ਸਮਾਗਮ ਅਗਲੇ ਦਿਨ ਹੋਵੇਗਾ। ਇੰਡੀਆ ਮੂਲ ਦੇ ਸਾਬਕਾ ਚਾਂਸਲਰ ਰਿਸ਼ੀ ਸੂਨਕ ਨੇ ਲੰਡਨ ਦੇ ਵੈਂਬਲੀ ‘ਚ ਰੱਖੇ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਚੋਣ ਮੁਹਿੰਮ ਦੌਰਾਨ ਪਰਿਵਾਰ ਵੱਲੋਂ ਮਿਲੀ ਹਮਾਇਤ ਲਈ ਧੰਨਵਾਦ ਕੀਤਾ। ਸੂਨਕ ਨੇ ਕਿਹਾ, ‘ਚੋਣ ਮੁਹਿੰਮ ਦਾ ਇਹ ਆਖਰੀ ਪੜਾਅ ਮੇਰੇ ਲਈ ਬਹੁਤ ਖਾਸ ਹੈ ਕਿਉਂਕਿ ਜਿਨ੍ਹਾਂ ਦੋ ਲੋਕਾਂ- ਮੇਰੀ ਮਾਂ ਤੇ ਪਿਤਾ, ਨੇ ਮੈਨੂੰ ਲੋਕ ਸੇਵਾ ਦੇ ਖੇਤਰ ‘ਚ ਦਾਖ਼ਲ ਹੋਣ ਲਈ ਪ੍ਰੇਰਨਾ ਦਿੱਤੀ, ਅੱਜ ਰਾਤ ਉਹ ਇਥੇ ਮੌਜੂਦ ਹਨ।’ ਸੂਨਕ ਦੇ ਪਿਤਾ ਯਸ਼ਵੀਰ ਪੇਸ਼ੇ ਵਜੋਂ ਡਾਕਟਰ ਜਦੋਂਕਿ ਮਾਂ ਊਸ਼ਾ ਫਾਰਮਾਸਿਸਟ ਹਨ। ਸਮਾਗਮ ‘ਚ ਸੂਨਕ ਦੀ ਪਤਨੀ ਅਕਸ਼ਤਾ ਵੀ ਮੌਜੂਦ ਸੀ। ਅਕਸ਼ਤਾ ਇਨਫੋਸਿਸ ਦੇ ਸਹਿ-ਬਾਨੀ ਨਰਾਇਣ ਮੂਰਤੀ ਤੇ ਲੇਖਿਕਾ ਸੁਧਾ ਮੂਰਤੀ ਦੀ ਧੀ ਹੈ।
