ਇੰਡੀਆ ਦੇ ਸੁਮਿਤ ਨਾਗਲ ਨੇ ਚੇਨਈ ਓਪਨ ਏ.ਟੀ.ਪੀ. ਚੈਲੰਜਰ ਟੂਰਨਾਮੈਂਟ ‘ਚ ਆਪਣੀ ਸ਼ਾਨਦਾਰ ਲੈਅ ਨੂੰ ਜਾਰੀ ਰੱਖਦੇ ਹੋਏ ਬ੍ਰਿਟੇਨ ਦੇ ਜੇ ਕਲਾਰਕ ਨੂੰ 6-1, 6-4 ਨਾਲ ਹਰਾ ਕੇ ਪੁਰਸ਼ ਸਿੰਗਲਜ਼ ਦੇ ਸੈਮੀਫਾਈਨਲ ‘ਚ ਪ੍ਰਵੇਸ਼ ਕਰ ਲਿਆ। ਵਿਸ਼ਵ ਦੇ 506ਵੇਂ ਨੰਬਰ ਦੇ ਖਿਡਾਰੀ ਨਾਗਲ ਨੇ ਇਕ ਘੰਟਾ 22 ਮਿੰਟ ਤੱਕ ਚੱਲੇ ਕੁਆਰਟਰ ਫਾਈਨਲ ‘ਚ ਜਿੱਤ ਦਰਜ ਕੀਤੀ। ਇਸ ਜਿੱਤ ਨਾਲ ਹੁਣ ਉਹ ਆਖ਼ਰੀ ਚਾਰ ‘ਚ ਅਮਰੀਕਾ ਦੇ ਨਿਕੋਲਸ ਮੋਰੇਨੋ ਡੀ ਅਲਬੋਰਨ ਨਾਲ ਭਿੜੇਗਾ। ਅਲਬੋਰਨ ਨੇ ਦੂਜੇ ਦੌਰ ‘ਚ ਚੋਟੀ ਦਾ ਦਰਜਾ ਪ੍ਰਾਪਤ ਚੁਨ ਸਿਨ ਸੇਂਗ ਨੂੰ ਹਰਾਇਆ ਸੀ। ਉਸ ਨੇ ਕੁਆਰਟਰ ਫਾਈਨਲ ‘ਚ ਜਾਪਾਨ ਦੇ ਯਾਸੁਤਾਕਾ ਉਚਿਆਮਾ ਨੂੰ ਇਕ ਘੰਟੇ 25 ਮਿੰਟ ‘ਚ 6-3, 6-4 ਨਾਲ ਹਰਾਇਆ। ਨਾਗਲ ਨੇ ਪਹਿਲੇ ਸੈੱਟ ‘ਤੇ ਪੂਰੀ ਤਰ੍ਹਾਂ ਦਬਦਬਾ ਬਣਾਇਆ ਅਤੇ 25 ਸਾਲਾ ਭਾਰਤੀ ਨੇ ਹਿੱਟ ਦੇ ਜ਼ੋਰ ਨਾਲ ਬ੍ਰਿਟੇਨ ਦੇ ਖਿਡਾਰੀ ਨੂੰ ਸੰਤੁਲਨ ਤੋਂ ਦੂਰ ਰੱਖਿਆ। ਉਸਨੂੰ ਇਕ ਵੀ ਬਰੇਕ ਪੁਆਇੰਟ ਦਾ ਸਾਹਮਣਾ ਨਹੀਂ ਕਰਨਾ ਪਿਆ। ਦੂਜੀ ਗੇਮ ‘ਚ ਹਾਲਾਂਕਿ ਨਾਗਲ ਨੂੰ ਕਲਾਰਕ ਤੋਂ ਕੁਝ ਚੁਣੌਤੀ ਦਾ ਸਾਹਮਣਾ ਕਰਨਾ ਪਿਆ ਪਰ ਉਸ ਨੇ ਸਰਵਿਸ ਬ੍ਰੇਕ ਨਾਲ ਸੈੱਟ ਜਿੱਤ ਕੇ ਮੈਚ ਜਿੱਤ ਲਿਆ। ਆਸਟਰੇਲੀਆ ਦੇ ਮੈਕਸ ਪਰਸੇਲ ਨੇ ਦੂਜਾ ਦਰਜਾ ਪ੍ਰਾਪਤ ਜੇਮਸ ਡਕਵਰਥ ਨੂੰ 6-4, 4-6, 6-4 ਨਾਲ ਹਰਾਇਆ। ਹੁਣ ਉਹ ਸੈਮੀਫਾਈਨਲ ‘ਚ ਹਮਵਤਨ ਡੈਨ ਸਵੀਨੀ ਨਾਲ ਭਿੜੇਗਾ। ਡਬਲਜ਼ ‘ਚ ਸੇਬੇਸਟੀਅਨ ਓਫਨਰ ਅਤੇ ਨੀਨੋ ਸੇਰਦਾਰੁਸਿਚ ਦੀ ਜੋੜੀ ਨੇ ਸੈਮੀਫਾਈਨਲ ‘ਚ ਐਨ ਸ਼੍ਰੀਰਾਮ ਬਾਲਾਜੀ ਅਤੇ ਜੀਵਨ ਨੇਦੁਨਚੇਝਿਆਨ ਦੀ ਚੋਟੀ ਦਾ ਦਰਜਾ ਪ੍ਰਾਪਤ ਜੋੜੀ ਨੂੰ 4-6, 7-6, 10-4 ਨਾਲ ਹਰਾਇਆ। ਇੰਡੀਆ ਦੇ ਅਰਜੁਨ ਖਾੜੇ ਨੇ ਕਲਾਰਕ ਨਾਲ ਮਿਲ ਕੇ ਪੈਟਰ ਨੋਜ਼ਾ ਅਤੇ ਐਂਡਰਿਊ ਪੈਟਰ ਪੋਲਸਨ ਦੀ ਚੈੱਕ ਜੋੜੀ ਨੂੰ 7-5, 4-6, 10-8 ਨਾਲ ਹਰਾਇਆ।
