ਮੁਜ਼ਬੀਮ ਉਰ ਰਹਿਮਾਨ ਤੇ ਰਾਸ਼ਿਦ ਖਾਨ ਦੀ ਫਿਰਕੀ ਦੇ ਜਾਦੂ ਤੋਂ ਬਾਅਦ ਨਜ਼ੀਬਉੱਲ੍ਹਾ ਜ਼ਾਦਰਾਨ ਤੇ ਇਬ੍ਰਾਹਿਮ ਜ਼ਾਦਰਾਨ ਦੀਆਂ ਅਜੇਤੂ ਪਾਰੀਆਂ ਨਾਲ ਅਫਗਾਨਿਸਤਾਨ ਗਰੁੱਪ-ਬੀ ਮੈਚ ‘ਚ ਬੰਗਲਾਦੇਸ਼ ਨੂੰ 7 ਵਿਕਟਾਂ ਨਾਲ ਹਰਾ ਕੇ ਲਗਾਤਾਰ ਦੂਜੀ ਜਿੱਤ ਦੇ ਨਾਲ ਏਸ਼ੀਆ ਕੱਪ ਟੀ-20 ਕ੍ਰਿਕਟ ਟੂਰਨਾਮੈਂਟ ਦੇ ਸੁਪਰ-4 ‘ਚ ਜਗ੍ਹਾ ਬਣਾਉਣ ਵਾਲੀ ਪਹਿਲੀ ਟੀਮ ਬਣ ਗਿਆ। ਬੰਗਲਾਦੇਸ਼ ਦੀਆਂ 128 ਦੌੜਾਂ ਦੀ ਟੀਚੇ ਦਾ ਪਿੱਛਾ ਕਰਦਿਆਂ ਅਫਗਾਨਿਸਤਾਨ ਨੇ ਨਜ਼ੀਬਉੱਲ੍ਹਾ (17 ਗੇਂਦਾਂ ‘ਤੇ 6 ਛੱਕਿਆਂ ਤੇ 1 ਚੌਕੇ ਨਾਲ ਅਜੇਤੂ 43) ਤੇ ਇਬ੍ਰਾਹਿਮ (41 ਗੇਂਦਾਂ ‘ਤੇ 4 ਚੌਕਿਆਂ ਨਾਲ ਅਜੇਤੂ 42) ਵਿਚਾਲੇ ਚੌਥੀ ਵਿਕਟ ਲਈ 69 ਦੌੜਾਂ ਦੀ ਸਾਂਝੇਦਾਰੀ ਦੀ ਬਦੌਲਤ 9 ਗੇਂਦਾਂ ਬਾਕੀ ਰਹਿੰਦਿਆਂ 3 ਵਿਕਟਾਂ ‘ਤੇ 131 ਦੌੜਾਂ ਬਣਾ ਕੇ ਸ਼ਾਨਦਾਰ ਜਿੱਤ ਦਰਜ ਕਰ ਲਈ। ਨਜ਼ੀਬਉੱਲ੍ਹਾ ਨੇ ਮੋਸਾਦੇਕ ਹੁਸੈਨ ‘ਤੇ ਛੱਕਾ ਲਾ ਕੇ ਅਫਗਾਨਿਸਤਾਨ ਨੂੰ ਜਿੱਤ ਦਿਵਾਈ। ਇਸ ਤੋਂ ਪਹਿਲਾਂ ਮੁਜ਼ੀਬ ਨੇ 16 ਜਦਕਿ ਰਾਸ਼ਿਦ ਨੇ 22 ਦੌੜਾਂ ਦੇ ਕੇ 3-3 ਵਿਕਟਾਂ ਲਈਆਂ ਜਿਸ ਨਾਲ ਬੰਗਲਾਦੇਸ਼ ਦੀ ਟੀਮ 7 ਵਿਕਟਾਂ ‘ਤੇ 127 ਦੌੜਾਂ ਹੀ ਬਣਾ ਸਕੀ। ਮੋਸਾਦੇਕ ਹੁਸੈਨ ਨੇ (31 ਗੇਂਦਾਂ ‘ਤੇ 4 ਚੌਕੇ ਤੇ 1 ਛੱਕੇ ਨਾਲ ਅਜੇਤੂ 48) ਨੇ ਕਰੀਅਰ ਦੀ ਸਰਵਸ੍ਰੇਸ਼ਠ ਪਾਰੀ ਖੇਡੀ ਜਦਕਿ ਮਹਿਮੂਦਉੱਲ੍ਹਾ (25) ਨੇ ਉਪਯੋਗੀ ਯੋਗਦਾਨ ਦੇ ਕੇ ਬੰਗਲਾਦੇਸ਼ ਨੂੰ ਚੁਣੌਤੀਪੂਰਨ ਸਕੋਰ ਤਕ ਪਹੁੰਚਾਇਆ ਸੀ। ਟੀਚੇ ਦਾ ਪਿੱਛਾ ਕਰਦਿਆਂ ਅਫਗਾਨਿਸਤਾਨ ਦੀ ਸ਼ੁਰੂਆਤ ਵੀ ਚੰਗੀ ਨਹੀਂ ਰਹੀ। ਰਹਿਮਾਨ ਗੁਰਬਾਜ਼ (11) ਨੂੰ 6 ਦੌੜਾਂ ਦੇ ਸਕੋਰ ‘ਤੇ ਸ਼ਾਕਿਬ ਅਲ ਹਸਨ (31 ਦੌੜਾਂ ‘ਤੇ 1 ਵਿਕਟ) ਗੇਂਦ ‘ਤੇ ਜੀਵਨਦਾਨ ਮਿਲਿਆ ਪਰ ਉਹ ਇਸਦਾ ਫਾਇਦਾ ਨਹੀਂ ਚੁੱਕ ਸਕਿਆ ਤੇ ਬੰਗਲਾਦੇਸ਼ ਦੇ ਕਪਤਾਨ ਦੀ ਗੇਂਦ ‘ਤੇ ਹੀ ਸਟੰਪ ਹੋ ਗਿਆ। ਸਲਾਮੀ ਬੱਲੇਬਾਜ਼ ਹਜ਼ਰਤਉੱਲ੍ਹਾ ਜਜ਼ਈ (25) ਨੇ ਮੇਹਦੀ ਹਸਨ ‘ਤੇ ਦੋ ਚੌਕਿਆਂ ਦੇ ਨਾਲ ਪਾਵਰ ਪਲੇਅ ‘ਚ ਟੀਮ ਦਾ ਸਕੋਰ ਇਕ ਵਿਕਟ ‘ਤੇ 29 ਦੌੜਾਂ ਤਕ ਪਹੁੰਚਾਇਆ। ਇਬ੍ਰਾਹਿਮ ਨੇ ਵੀ ਤਾਸਕਿਨ ਅਹਿਮਦ ‘ਤੇ ਚੌਕਾ ਲਾਇਆ ਪਰ ਮੋਸਾਦੇਕ (12 ਦੌੜਾਂ ‘ਤੇ 1 ਵਿਕਟ) ਨੇ ਹਜ਼ਰਤਉੱਲ੍ਹਾ ਨੂੰ ਐੱਲ.ਬੀ.ਡਬਲਿਊ. ਕਰ ਦਿੱਤਾ। ਮੁਹੰਮਦ ਸੈਫਉੱਦੀਨ (27 ਦੌੜਾਂ ‘ਤੇ 1 ਵਿਕਟ) ਨੇ ਅਫਗਾਨਿਸਤਾਨ ਦੇ ਕਪਤਾਨ ਮੁਹੰਮਦ ਨਬੀ (8) ਨੂੰ ਐੱਲ.ਬੀ.ਡਬਲਿਊ. ਕਰ ਕੇ 13ਵੇਂ ਓਵਰ ‘ਚ ਅਫਗਾਨਿਸਤਾਨ ਦਾ ਸਕੋਰ 3 ਵਿਕਟਾਂ ‘ਤੇ 62 ਦੌੜਾਂ ਕਰ ਦਿੱਤਾ ਪਰ ਇਸ ਤੋਂ ਬਾਅਦ ਨਜ਼ੀਬਉੱਲ੍ਹਾ ਤੇ ਇਬ੍ਰਾਹਿਮ ਨੇ ਸ਼ਾਨਦਾਰ ਜਿੱਤ ਆਪਣੀ ਟੀਮ ਦੀ ਝੋਲੀ ‘ਚ ਪਾ ਦਿੱਤੀ।
