ਮਹਿਲਾ ਵਰਲਡ ਬਾਕਸਿੰਗ ਚੈਂਪੀਅਨਸ਼ਿਪ ‘ਚ ਇੰਡੀਆ ਲਈ ਬਹੁਤ ਵਧੀਆ ਦਿਨ ਰਿਹਾ ਕਿਉਂਕਿ ਇੰਡੀਆ ਦੀਆਂ ਚਾਰ ਮੁੱਕੇਬਾਜ਼ ਫਾਈਨਲ ‘ਚ ਪਹੁੰਚੀਆਂ। ਮੌਜੂਦਾ ਚੈਂਪੀਅਨ ਨਿਖ਼ਤ ਜ਼ਰੀਨ (50 ਕਿਲੋਗ੍ਰਾਮ), ਨੀਤੂ ਘਣਗਸ (48 ਕਿਲੋ), ਲਵਲੀਨਾ ਬੋਰਗੋਹੇਨ (75 ਕਿਲੋ) ਤੇ ਸਵੀਟੀ ਬੂਰਾ (81 ਕਿਲੋ) ਨੇ ਆਪੋ ਆਪਣੇ ਮੁਕਾਬਲਿਆਂ ‘ਚ ਸ਼ਾਨਦਾਰ ਜਿੱਤਾਂ ਨਾਲ ਫਾਈਨਲ ‘ਚ ਥਾਂ ਬਣਾ ਲਈ। ਨਿਖ਼ਤ ਨੇ ਰੀਓ ਓਲੰਪਿਕ ਦੀ ਕਾਂਸੀ ਦਾ ਤਗ਼ਮਾ ਜੇਤੂ ਕੋਲੰਬੀਆ ਦੀ ਇਨਗਰਿਟ ਵੈਲੇਂਸੀਆ ਨੂੰ 5-0 ਨਾਲ ਹਰਾਇਆ। ਉਧਰ ਨੀਤੂ ਨੇ ਕਜ਼ਾਖਸਤਾਨ ਦੀ ਅਲੂਆ ਬਾਲਕੀਬੇਕੋਵਾ ‘ਤੇ 5-2 ਨਾਲ ਜਿੱਤ ਦਰਜ ਕੀਤੀ। ਨਿਖ਼ਤ ਨੇ ਆਪਣੀ ਫੁਰਤੀ ਤੇ ਰਣਨੀਤਕ ਸਮਰੱਥਾ ਨਾਲ ਵੈਲੇਂਸੀਆ ਨੂੰ ਸ਼ਿਕਸਤ ਦਿੱਤੀ ਅਤੇ ਆਪਣੇ ਖ਼ਿਤਾਬ ਦੇ ਬਚਾਅ ਵੱਲ ਕਦਮ ਵਧਾਇਆ। ਇਸ ਤੋਂ ਪਹਿਲਾਂ ਨੀਤੂ ਅਤੇ ਬਾਲਕੀਬੇਕੋਵਾ ਦਰਮਿਆਨ ਮੁਕਾਬਲਾ ਪਿਛਲੇ ਸਾਲ ਦੇ ਕੁਆਰਟਰਫਾਈਨਲ ਵਰਗਾ ਹੀ ਸੀ। ਇਸ ‘ਚ ਰਾਸ਼ਟਰਮੰਡਲ ਖੇਡਾਂ ਦੀ ਚੈਂਪੀਅਨ ਨੀਤੂ ਅਤੇ ਬਾਲਕੀਬੇਕੋਵਾ ਨੇ ਪਹਿਲੇ ਗੇੜ ‘ਚ ਇਕ ਦੂਜੇ ‘ਤੇ ਜ਼ੋਰਦਾਰ ਪੰਚ ਜੜੇ। ਹਾਲਾਂਕਿ ਕਜ਼ਾਖਸਤਾਨ ਦੀ ਮੁੱਕੇਬਾਜ਼ ਵੱਧ ਭਾਰੂ ਰਹੀ। ਇਸ ਤਰ੍ਹਾਂ ਪਹਿਲਾ ਰਾਊਂਡ 3-2 ਨਾਲ ਉਸ ਦੇ ਨਾਮ ਰਿਹਾ। ਦੂਸਰੇ ਰਾਊਂਡ ‘ਚ ਹਾਲਾਂਕਿ ਨੀਤੂ ਨੇ ਵਾਪਸੀ ਕਰਦਿਆਂ ਜ਼ੋਰਦਾਰ ਮੁੱਕੇ ਜੜੇ। ਦੋਵੇਂ ਮੁੱਕੇਬਾਜ਼ ਇਕ-ਦੂਸਰੇ ਨੂੰ ਮਾਤ ਦੇਣ ਦੀਆਂ ਕੋਸ਼ਿਸ਼ਾਂ ਕਰਦੀਆਂ ਰਹੀਆਂ, ਪਰ ਨੀਤੂ ਇਸ ਰਾਊਂਡ ਨੂੰ ਆਪਣੇ ਨਾਮ ਕਰਨ ‘ਚ ਸਫਲ ਰਹੀ। ਅਗਲੇ ਤਿੰਨ ਮਿੰਟ ਕਾਫੀ ਤਣਾਅਪੂਰਨ ਰਹੇ ਜਿਸ ‘ਚ ਨੀਤੂ ਨੇ ਬਾਲਕੀਬੇਕੋਵਾ ਤੋਂ ਬਿਹਤਰ ਪ੍ਰਦਰਸ਼ਨ ਕੀਤਾ। ਇਸ ਮੁਕਾਬਲੇ ਦਾ ‘ਰੀਵਿਊ’ ਕੀਤਾ ਗਿਆ ਅਤੇ ਨੀਤੂ ਨੂੰ ਜੇਤੂ ਐਲਾਨਿਆ ਗਿਆ।
