ਨਾਈਜੀਰੀਆ ਦੇ ਇਕ ਪਿੰਡ ‘ਚ ਬੰਦੂਕਧਾਰੀਆਂ ਦੇ ਦੋ ਹਮਲਿਆਂ ‘ਚ ਘੱਟੋ-ਘੱਟ 50 ਲੋਕਾਂ ਦੀ ਮੌਤ ਹੋ ਗਈ। ਓਟੁਕਪੋ ਦੀ ਸਥਾਨਕ ਸਰਕਾਰ ਦੇ ਮੁਖੀ ਰੂਬੇਨ ਬਾਕੋ ਨੇ ਕਿਹਾ ਕਿ ਬੰਦੂਕਧਾਰੀਆਂ ਨੇ ਬੇਨਿਊ ਰਾਜ ਦੇ ਉਮੋਗਿਦੀ ਪਿੰਡ ‘ਚ 47 ਲੋਕਾਂ ਦੀ ਹੱਤਿਆ ਕਰ ਦਿੱਤੀ। ਇਕ ਦਿਨ ਪਹਿਲਾਂ ਇਸੇ ਥਾਂ ‘ਤੇ 3 ਹੋਰ ਲੋਕਾਂ ਦੀ ਹੱਤਿਆ ਕਰ ਦਿੱਤੀ ਗਈ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਹਮਲੇ ਦਾ ਮਕਸਦ ਅਜੇ ਤੱਕ ਪਤਾ ਨਹੀਂ ਲੱਗਾ ਹੈ। ਹਾਲਾਂਕਿ ਦੋਹਾਂ ਹਮਲਿਆਂ ਦੇ ਇਕ-ਦੂਸਰੇ ਨਾਲ ਜੁੜੇ ਹੋਣ ਦਾ ਖਦਸ਼ਾ ਹੈ। ਕਿਸੇ ਸੰਗਠਨ ਨੇ ਵੀ ਅਜੇ ਤੱਕ ਹਮਲੇ ਦੀ ਜ਼ਿੰਮੇਵਾਰੀ ਨਹੀਂ ਲਈ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸ਼ੱਕ ਹੈ ਕਿ ਸਥਾਨਕ ਚਰਵਾਹਿਆਂ ਨੇ ਹਮਲੇ ਕੀਤੇ ਕਿਉਂਕਿ ਪਹਿਲਾਂ ਵੀ ਉੱਤਰੀ-ਮੱਧ ਨਾਈਜੀਰੀਆ ‘ਚ ਜ਼ਮੀਨੀ ਵਿਵਾਦ ਨੂੰ ਲੈ ਕੇ ਕਿਸਾਨਾਂ ਨਾਲ ਉਨ੍ਹਾਂ ਦੇ ਕਈ ਝਗੜੇ ਹੋ ਚੁੱਕੇ ਹਨ। ਕਿਸਾਨਾਂ ਨੇ ਚਰਵਾਹਿਆਂ ‘ਤੇ ਪਸ਼ੂਆਂ ਨੂੰ ਚੋਰੀ ਕਰਨ ਅਤੇ ਉਨ੍ਹਾਂ ਦੀਆਂ ਫ਼ਸਲਾਂ ਨੂੰ ਨਸ਼ਟ ਕਰਨ ਦੇ ਦੋਸ਼ ਲਾਏ ਹਨ।
