ਲੰਡਨ ਦੀ ਸਭ ਤੋਂ ਉੱਚੀ ਇਮਾਰਤ ‘ਦਿ ਸ਼ਾਰਡ’ ਦਾ ਡਿਜ਼ਾਈਨ ਤਿਆਰ ਕਰਨ ਵਾਲੀ ਭਾਰਤੀ ਮੂਲ ਦੀ ਸਟ੍ਰਕਚਰਲ ਇੰਜੀਨੀਅਰ ਨੂੰ ਇੰਗਲੈਂਡ ਦੀ ਨੌਰਥੰਬਰੀਆ ਯੂਨੀਵਰਸਿਟੀ ਨੇ ਆਨਰੇਰੀ ਡਿਗਰੀ ਪ੍ਰਦਾਨ ਕੀਤੀ। ਰੋਮਾ ਅਗਰਵਾਲ (39) ਨੂੰ ਇਕ ਪ੍ਰਮੁੱਖ ਮਹਿਲਾ ਸਟ੍ਰਕਚਰਲ ਇੰਜੀਨੀਅਰ ਦੇ ਰੂਪ ‘ਚ ਉਸਦੇ ਕੈਰੀਅਰ ਦੀ ਮਾਨਤਾ ਦੇ ਨਾਲ-ਨਾਲ ਨੌਜਵਾਨਾਂ ਅਤੇ ਘੱਟ ਨੁਮਾਇੰਦਗੀ ਵਾਲੇ ਸਮੂਹਾਂ ‘ਚ ਇੰਜੀਨੀਅਰਿੰਗ, ਵਿਗਿਆਨਕ ਅਤੇ ਤਕਨੀਕੀ ਕੈਰੀਅਰ ਨੂੰ ਉਤਸ਼ਾਹਤ ਕਰਨ ਲਈ ਉਸਦੇ ਕੰਮ ਲਈ ਡਾਕਟਰ ਆਫ਼ ਸਾਇੰਸ ਦੀ ਡਿਗਰੀ ਨਾਲ ਸਨਮਾਨਿਤ ਕੀਤਾ ਗਿਆ। ਅਗਰਵਾਲ ਨੇ ਪੁਰਸਕਾਰ ਪ੍ਰਾਪਤ ਕਰਨ ਤੋਂ ਬਾਅਦ ਕਿਹਾ ਕਿ ਨਰਥੰਬਰੀਆ ਯੂਨੀਵਰਸਿਟੀ ਤੋਂ ਇਹ ਪੁਰਸਕਾਰ ਪ੍ਰਾਪਤ ਕਰਨਾ ਇਕ ਵਾਸਤਵਿਕ ਸਨਮਾਨ ਅਤੇ ਖੁਸ਼ੀ ਦੀ ਗੱਲ ਹੈ, ਇਕ ਅਜਿਹੀ ਜਗ੍ਹਾ ਜਿਸ ਨੂੰ ਮੈਂ ਆਪਣੇ ਦਿਲ ਦੇ ਨੇੜੇ ਰੱਖਦੀ ਹਾਂ। ਯੂਨੀਵਰਸਿਟੀ ਤੋਂ ਗ੍ਰੈਜੂਏਟ ਹੋਣ ਤੋਂ ਬਾਅਦ ਅਗਰਵਾਲ ਦਾ ਪਹਿਲਾ ਕੰਮ ਨਿਊਕੈਸਲ ਸੈਂਟਰਲ ਮੋਟਰਵੇਅ ਨੂੰ ਪਾਰ ਕਰਨ ਵਾਲੇ ਵਿਲੱਖਣ ਫੁੱਟਬ੍ਰਿਜ ਨੂੰ ਡਿਜ਼ਾਈਨ ਕਰਨਾ ਅਤੇ ਬਣਾਉਣਾ ਸੀ। ਪੁਰਸਕਾਰ ਜੇਤੂ ਇੰਜੀਨੀਅਰ, ਲੇਖਕ ਅਤੇ ਪ੍ਰਸਾਰਕ ਨੇ ਕਿਹਾ ਕਿ ਮੈਂ ਅਕਸਰ ਫੁੱਟਬ੍ਰਿਜ ਦਾ ਹਵਾਲਾ ਦਿੰਦੀ ਹਾਂ, ਜੋ ਕਿ ਮੇਰਾ ਪਹਿਲਾ ਇੰਜੀਨੀਅਰਿੰਗ ਪ੍ਰੋਜੈਕਟ ਸੀ। ਇਹ ਉਦਾਰ ਮਾਨਤਾ ਪ੍ਰਾਪਤ ਕਰਨਾ ਮੇਰੇ ਲਈ ਬਹੁਤ ਮਾਇਨੇ ਰੱਖਦਾ ਹੈ। ਇਹ ਪੁਲ 2007 ‘ਚ ਸਥਾਪਤ ਕੀਤਾ ਗਿਆ ਸੀ, ਜੋ ਨੌਰਥੰਬਰੀਆ ਯੂਨੀਵਰਸਿਟੀ ਦੇ ਪੂਰਬ ਅਤੇ ਪੱਛਮੀ ਸ਼ਹਿਰ ਦੇ ਕੈਂਪਸ ਨੂੰ ਜੋੜਦਾ ਹੈ ਅਤੇ ਨਿਊਕੈਸਲ ਦੇ ਕੇਂਦਰ ‘ਚ ਇਕ ਸੁਰੱਖਿਅਤ ਪੈਦਲ ਅਤੇ ਸਾਈਕਲ ਰੂਟ ਪ੍ਰਦਾਨ ਕਰਦਾ ਹੈ। ਹਾਲਾਂਕਿ ਉਹ ਦਿ ਸ਼ਾਰਡ-ਲੰਡਨ ਦੇ ਲੈਂਡਮਾਰਕ 95 ਮੰਜ਼ਿਲਾ ਉੱਚੀ ਸਕਾਈਸਕ੍ਰੈਪਰ ਨਾਲ ਆਪਣੇ ਕੰਮ ਲਈ ਸਭ ਤੋਂ ਵੱਧ ਜਾਣੀ ਜਾਂਦੀ ਹੈ ਜੋ ਪੱਛਮੀ ਯੂਰਪ ਦੀ ਸਭ ਤੋਂ ਉੱਚੀ ਇਮਾਰਤ ਹੈ। ਸਕੂਲਾਂ, ਯੂਨੀਵਰਸਿਟੀਆਂ ਅਤੇ ਸੰਸਥਾਵਾਂ ‘ਚ ਸੈਂਕੜੇ ਭਾਸ਼ਣ ਦੇਣ ਤੋਂ ਇਲਾਵਾ, ਅਗਰਵਾਲ ਆਪਣੇ ਖੁਦ ਦੇ ਪੋਡਕਾਸਟ ਦੀ ਮੇਜ਼ਬਾਨੀ ਵੀ ਕਰਦੀ ਹੈ ਅਤੇ ਬਾਲਗਾਂ ਅਤੇ ਬੱਚਿਆਂ ਲਈ ਕਿਤਾਬਾਂ ਪ੍ਰਕਾਸ਼ਿਤ ਕੀਤੀਆਂ ਹਨ ਜੋ ਕਿ ਦੁਨੀਆ ਦੀਆਂ ਸਭ ਤੋਂ ਮਸ਼ਹੂਰ ਇਮਾਰਤਾਂ ਕਿਵੇਂ ਬਣਾਈਆਂ ਗਈਆਂ ਸਨ, ਦੀਆਂ ਦਿਲਚਸਪ ਕਹਾਣੀਆਂ ਦੱਸਦੀਆਂ ਹਨ। ਉਸ ਨੂੰ ਇੰਜੀਨੀਅਰਿੰਗ ਦੀਆਂ ਸੇਵਾਵਾਂ ਲਈ 2018 ‘ਚ ਐੱਮ.ਬੀ.ਈ. ਨਾਲ ਸਨਮਾਨਿਤ ਕੀਤਾ ਗਿਆ ਸੀ। ਨਾਲ ਹੀ ਉਹ ਸਿਵਲ ਇੰਜੀਨੀਅਰਜ਼ ਦੀ ਸੰਸਥਾ, ਸਟ੍ਰਕਚਰਲ ਇੰਜੀਨੀਅਰਜ਼ ਦੀ ਸੰਸਥਾ ਅਤੇ ਰਾਇਲ ਇੰਸਟੀਚਿਊਟ ਆਫ਼ ਚਾਰਟਰਡ ਸਰਵੇਅਰਜ਼ ਦੀ ਫੈਲੋ ਹੈ। ਰੋਮਾ ਅਗਰਵਾਲ ਨੇ ਯੂਨੀਵਰਸਿਟੀ ਦੇ ਸਰਦੀਆਂ ਦੇ ਗ੍ਰੈਜੂਏਸ਼ਨ ਸਮਾਰੋਹਾਂ ਦੌਰਾਨ ਆਪਣੀ ਆਨਰੇਰੀ ਡਿਗਰੀ ਪ੍ਰਾਪਤ ਕੀਤੀ, ਜੋ ਕਿ ਨੌਰਥੰਬਰੀਆ ਦੇ ਨਿਊਕੈਸਲ ਸਿਟੀ ਕੈਂਪਸ ‘ਚ ਆਯੋਜਿਤ ਕੀਤੇ ਗਏ ਸਨ।
