ਮਹਿਲਾ ਏਸ਼ੀਆ ਕੱਪ ਦੇ ਇਕਪਾਸੜ ਮੈਚ ‘ਚ ਇੰਡੀਆ ਨੇ ਥਾਈਲੈਂਡ ਨੂੰ 9 ਵਿਕਟਾਂ ਨਾਲ ਹਰਾ ਕੇ ਜਿੱਤ ਦਰਜ ਕੀਤੀ ਹੈ। ਇੰਡੀਆ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਦੇ ਹੋਏ ਥਾਈਲੈਂਡ ਨੂੰ 15.1 ਓਵਰਾਂ ‘ਚ 37 ਦੌੜਾਂ ‘ਤੇ ਆਊਟ ਕਰ ਦਿੱਤਾ। ਜਵਾਬ ‘ਚ ਇੰਡੀਆ ਨੇ ਸਿਰਫ 6 ਓਵਰਾਂ ‘ਚ ਹੀ ਟੀਚਾ ਹਾਸਲ ਕਰਕੇ ਜਿੱਤ ਦਰਜ ਕਰ ਲਈ। ਭਾਰਤੀ ਗੇਂਦਬਾਜ਼ਾਂ ਸਾਹਮਣੇ ਥਾਈਲੈਂਡ ਦੀਆਂ ਬੱਲੇਬਾਜ਼ ਟਿਕ ਨਹੀਂ ਸਕੀਆਂ। ਉਸ ਦੀ ਟੀਮ ਦੀ ਸਿਰਫ ਇਕ ਬੱਲੇਬਾਜ਼ ਨਾਨਪਟ ਕੋਂਚਨਰੀਓਨਕਾਈ (12) ਦੋਹਰੇ ਅੰਕੜੇ ਤੱਕ ਪਹੁੰਚੀ। ਇੰਡੀਆ ਲਈ ਸਨੇਹ ਰਾਣਾ ਨੇ ਤਿੰਨ ਜਦਕਿ ਰਾਜੇਸ਼ਵਰੀ ਗਾਇਕਵਾੜ ਅਤੇ ਦੀਪਤੀ ਸ਼ਰਮਾ ਨੇ ਦੋ-ਦੋ ਵਿਕਟਾਂ ਲਈਆਂ। ਮੇਘਨਾ ਸਿੰਘ ਨੂੰ ਇਕ ਵਿਕਟ ਮਿਲੀ। ਇੰਡੀਆ ਲਈ ਟੀਚੇ ਦਾ ਪਿੱਛਾ ਕਰਨ ਆਈ ਸ਼ੈਫਾਲੀ ਵਰਮਾ ਅੱਠ ਦੌੜਾਂ ਬਣਾ ਕੇ ਆਊਟ ਹੋ ਗਈ। ਸਬਹਿਨੇਨੀ ਮੇਘਨਾ ਨੇ 18 ਗੇਂਦਾਂ ‘ਤੇ ਤਿੰਨ ਚੌਕਿਆਂ ਦੀ ਮਦਦ ਨਾਲ ਨਾਬਾਦ 20 ਦੌੜਾਂ ਬਣਾਈਆਂ ਜਦਕਿ ਪੂਜਾ ਵਸਤਰਕਾਰ ਨੇ 12 ਗੇਂਦਾਂ ‘ਤੇ ਅਜੇਤੂ 12 ਦੌੜਾਂ ਬਣਾਈਆਂ। ਇੰਡੀਆ ਨੇ ਲੀਗ ਪੜਾਅ ‘ਚ ਆਪਣੇ ਛੇ ਵਿੱਚੋਂ ਪੰਜ ਮੈਚ ਜਿੱਤ ਕੇ ਮਹਿਲਾ ਏਸ਼ੀਆ ਕੱਪ 2022 ਦੇ ਸੈਮੀਫਾਈਨਲ ‘ਚ ਥਾਂ ਬਣਾ ਲਈ ਹੈ।
