ਤੀਰਅੰਦਾਜ਼ੀ ਵਰਲਡ ਕੱਪ ਗੇੜ-ਇਕ ‘ਚ ਤਿੰਨ ਆਸਾਨ ਜਿੱਤਾਂ ਦਰਜ ਕਰਦਿਆਂ ਜਯੋਤੀ ਸੁਰੇਖਾ ਵੇਨਮ ਅਤੇ ਓਜਸ ਦਿਓਤਲੇ ਕੰਪਾਊਂਡ ਵਰਗ ਦੇ ਫਾਈਨਲ ‘ਚ ਪਹੁੰਚ ਗਏ ਹਨ। ਇਸ ਜੋੜੀ ਦੇ ਫਾਈਨਲ ‘ਚ ਪਹੁੰਚਣ ਨਾਲ ਟੂਰਨਾਮੈਂਟ ‘ਚ ਇੰਡੀਆ ਦਾ ਦੂਜਾ ਤਗ਼ਮਾ ਪੱਕਾ ਹੋ ਗਿਆ ਹੈ। ਜਯੋਤੀ ਤੇ ਦਿਓਤਲੇ ਦੀ ਜੋੜੀ ਨੇ ਮਲੇਸ਼ੀਆ ਦੇ ਫਾਤਿਨ ਨੂਰਫਤੇਹਾ ਮਤ ਸਲੇਹ ਅਤੇ ਮੁਹੰਮਦ ਜੁਵੈਦੀ ਮਜ਼ੁਕੀ ਦੀ ਜੋੜੀ ਨੂੰ 157-154 ਅੰਕਾਂ ਦੇ ਫਰਕ ਨਾਲ ਹਰਾ ਕੇ ਸੋਨ ਤਗ਼ਮੇ ਲਈ ਮੁਕਾਬਲੇ ‘ਚ ਥਾਂ ਪੱਕੀ ਕੀਤੀ। ਫਾਈਨਲ ‘ਚ ਭਾਰਤੀ ਜੋੜੀ ਦਾ ਮੁਕਾਬਲਾ 12ਵਾਂ ਦਰਜਾ ਹਾਸਲ ਚੀਨੀ ਤਾਇਪੇ ਦੀ ਜੋੜੀ ਨਾਲ ਹੋਵੇਗਾ। ਇਸ ਤੋਂ ਪਹਿਲਾਂ ਇੰਡੀਆ ਦੇ ਅਤਨੂ ਦਾਸ, ਬੀ. ਧੀਰਜ ਅਤੇ ਤਰੁਨਦੀਪ ਰਾਏ ਦੀ ਪੁਰਸ਼ ਰਿਕਰਵ ਟੀਮ ਨੇ ਫਾਈਨਲ ‘ਚ ਜਗ੍ਹਾ ਬਣਾਈ ਸੀ ਜਿਸ ਦਾ ਮੁਕਾਬਲਾ ਐਤਵਾਰ ਨੂੰ ਚੀਨ ਦੀ ਟੀਮ ਨਾਲ ਹੋਣਾ ਹੈ। ਇਸੇ ਦੌਰਾਨ ਜਯੋਤੀ ਸੁਰੇਖਾ ਵੇਨਮ ਨੇ ਮਹਿਲਾ ਕੰਪਾਊਂਡ ਵਿਅਕਤੀਗਤ ਵਰਗ ਦੇ ਸੈਮੀਫਾਈਨਲ ‘ਚ ਵੀ ਜਗ੍ਹਾ ਬਣਾ ਲਈ ਹੈ। ਮਿਕਸਡ ਡਬਲਜ਼ ‘ਚ ਜਯੋਤੀ ਅਤੇ ਦਿਓਤਲੇ ਦੀ ਜੋੜੀ ਨੂੰ ਕੁਆਲੀਫਾਇੰਗ ‘ਚ ਦੂਜੇ ਸਥਾਨ ‘ਤੇ ਰਹਿਣ ਕਾਰਨ ਦੂਜੇ ਗੇੜ ‘ਚ ਬਾਈ ਮਿਲੀ। ਇਸ ਮਗਰੋਂ ਉਨ੍ਹਾਂ ਨੇ ਲਕਜ਼ਮਬਰਗ ਅਤੇ ਫਰਾਂਸ ਦੀਆਂ ਟੀਮਾਂ ਖ਼ਿਲਾਫ਼ ਦੋ ਮੈਚਾਂ ‘ਚ ਜਿੱਤ ਦਰਜ ਕੀਤੀ। ਭਾਰਤੀ ਜੋੜੀ ਨੇ ਦੋਵਾਂ ਮੈਚਾਂ ‘ਚ ਸਿਰਫ ਇਕ-ਇਕ ਅੰਕ ਗੁਆਇਆ। ਉਨ੍ਹਾਂ ਨੇ ਪ੍ਰੀ-ਕੁਆਰਟਰ ਅਤੇ ਕੁਆਰਟਰ ਦੋਵਾਂ ‘ਚ ਸੰਭਾਵਿਤ 160 ‘ਚੋਂ 159 ਅੰਕ ਹਾਸਲ ਕੀਤੇ ਜਦਕਿ ਲਕਜ਼ਮਬਰਗ ਦੀ ਟੀਮ 157 ਅਤੇ ਫਰਾਂਸ ਦੀ ਟੀਮ 156 ਅੰਕ ਹਾਸਲ ਕਰ ਸਕੀ।
