ਇੰਡੀਆ ਦੇ ਯੂਕੀ ਭਾਂਬਰੀ ਨੇ ਡਬਲਜ਼ ਵਰਗ ‘ਤੇ ਫੋਕਸ ਕਰਨ ਲਈ ਸਿੰਗਲਜ਼ ਟੈਨਿਸ ਨੂੰ ਅਲਵਿਦਾ ਕਹਿ ਦਿੱਤਾ ਹੈ। ਇਕ ਸਮੇਂ ‘ਤੇ ਟਾਪ-50 ਵਿਚ ਜਗ੍ਹਾ ਬਣਾਉਣ ਦੇ ਦਾਅਵੇਦਾਰ ਮੰਨਿਆ ਜਾ ਰਿਹਾ 28 ਸਾਲ ਦਾ ਯੂਕੀ ਟੈਨਿਸ ਕਰੀਅਰ ਨੂੰ ਵਧਾਉਣ ਲਈ ਸਿੰਗਲਜ਼ ਛੱਡਣ ਵਾਲੀ ਸਾਨੀਆ ਮਿਰਜ਼ਾ ਤੋਂ ਬਾਅਦ ਦੂਜਾ ਭਾਰਤੀ ਖਿਡਾਰੀ ਹੈ। ਸੱਟਾਂ ਤੋਂ ਪ੍ਰੇਸ਼ਾਨ ਯੂਕੀ ਨੇ ਕੁਝ ਸਮੇਂ ਪਹਿਲਾਂ ਹੀ ਮਨ ਬਣਾ ਲਿਆ ਸੀ ਕਿ ਹੁਣ ਉਹ ਸਿਰਫ ਡਬਲਜ਼ ਖੇਡੇਗਾ। ਉਸ ਨੇ ਕਿਹਾ, ‘ਮੈਂ ਸਿੰਗਲਜ਼ ਕਰੀਅਰ ‘ਚ ਆਪਣੇ ਵਲੋਂ ਸਰਵਸ੍ਰੇਸ਼ਠ ਕੋਸ਼ਿਸ਼ ਕੀਤੀ ਤੇ ਮੈਨੂੰ ਕੋਈ ਅਫਸੋਸ ਨਹੀਂ ਹੈ। ਸ਼ਾਇਦ ਮੇਰੀ ਕਿਸਮਤ ਖ਼ਰਾਬ ਸੀ, ਚੀਜ਼ਾਂ ਗਲਤ ਸਨ। ਮੈਨੂੰ ਨਹੀਂ ਪਤਾ। ਮੈਨੂੰ ਕੋਈ ਅਫਸੋਸ ਨਹੀਂ ਹੈ ਤੇ ਮੈਂ ਇਸ ਤੋਂ ਵੱਧ ਕੁਝ ਨਹੀਂ ਕਰ ਸਕਦਾ ਸੀ।’ ਉਸ ਨੇ ਕਿਹਾ, ‘ਇਹ ਸੱਟਾਂ ਦੇ ਕਾਰਨ ਹੋਇਆ ਹੈ, ਸਪਾਂਸਰਾਂ ਦੀ ਕਮੀ ਦੇ ਕਾਰਨ ਨਹੀਂ। ਸਪਾਂਸਰਾਂ ਦੇ ਬਿਨਾਂ ਵੀ ਮੈਂ ਚੰਗਾ ਪ੍ਰਦਰਸ਼ਨ ਕੀਤਾ ਹੈ ਤੇ ਅੱਗੇ ਵੀ ਕਰਾਂਗਾ ਪਰ ਸੱਟਾਂ ਦਾ ਕਾਫੀ ਅਸਰ ਹੋਇਆ।’ ਉਸ ਨੇ ਕਿਹਾ, ‘ਮੈਂ 2019 ‘ਚ ਤੈਅ ਕਰ ਲਿਆ ਸੀ ਕਿ ਮੈਨੂੰ ਡਬਲਜ਼ ਹੀ ਖੇਡਣਾ ਹੈ। ਮੈਂ ਕੁਝ ਸਿੰਗਲਜ਼ ਮੈਚ ਖੇਡ ਰਿਹਾ ਸੀ ਜਿਵੇਂ ਕਿ ਪਿਛਲੇ ਸਾਲ ਖੇਡੇ। ਮੈਂ 2021 ‘ਚ ਵੀ ਵਾਪਸੀ ਕਰਕੇ ਪਹਿਲੇ ਦੋ-ਤਿੰਨ ਟੂਰਨਾਮੈਂਟ ਖੇਡੇ ਤੇ ਫਿਰ ਅਮਰੀਕਾ ਚਲਾ ਗਿਆ। ਉਥੇ ਕਰੋਨਾ ਪਾਜ਼ੇਟਿਵ ਹੋ ਗਿਆ ਤੇ ਫਿਰ ਮੈਨੂੰ ਸੱਟ ਲੱਗ ਗਈ।’ ਡਬਲਜ਼ ‘ਚ ਉਸ ਨੂੰ ਕੀ ਪਸੰਦ ਹੈ, ਇਹ ਪੁੱਛਣ ‘ਤੇ ਯੂਕੀ ਨੇ ਕਿਹਾ, ‘ਇਹ ਕਾਫੀ ਤੇਜ਼ ਰਫਤਾਰ ਦੀ ਖੇਡ ਹੈ। ਦੋ ਮਿੰਟ ਦੇ ਅੰਦਰ ਪੂਰਾ ਮੈਚ ਬਦਲ ਜਾਂਦਾ ਹੈ। ਤੁਹਾਨੂੰ ਸਰਵਸ੍ਰੇਸ਼ਠ ਪ੍ਰਦਰਸ਼ਨ ਕਰਨਾ ਪੈਂਦਾ ਹੈ। ਕਾਰਜਭਾਰ ਵੀ ਵੱਖਰਾ ਹੈ ਪਰ ਸਰੀਰਿਕ ਰੂਪ ਨਾਲ ਇਹ ਸਿੰਗਲਜ਼ ਵਰਗਾ ਥਕਾਊ ਨਹੀਂ ਹੈ।’
