ਮਨਿਕਾ ਬਤਰਾ ਦੇ ਮਹਿਲਾ ਡਬਲਜ਼ ਅਤੇ ਮਿਕਸਡ ਡਬਲਜ਼ ਵਰਗ ‘ਚ ਆਪਣੇ ਜੋੜੀਦਾਰਾਂ ਨਾਲ ਹਾਰਨ ਮਗਰੋਂ ਇੱਥੇ ਸਿੰਗਾਪੁਰ ਸਮੈਸ਼ ਟੇਬਲ ਟੈਨਿਸ ਟੂਰਨਾਮੈਂਟ ‘ਚ ਇੰਡੀਆ ਦੀ ਚੁਣੌਤੀ ਖਤਮ ਹੋ ਗਈ। ਟੂਰਨਾਮੈਂਟ ਦੇ ਮਿਕਸਡ ਡਬਲਜ਼ ਵਰਗ ‘ਚ ਮਨਿਕਾ ਬੱਤਰਾ ਤੇ ਜੀ. ਸਾਥਿਆਨ ਦੀ ਜੋੜੀ ਨੂੰ 52 ਮਿੰਟ ਤੱਕ ਚੱਲੇ ਕੁਆਰਟਰ ਫਾਈਨਲ ਮੁਕਾਬਲੇ ‘ਚ ਜਾਪਾਨੀ ਖਿਡਾਰੀਆਂ ਹਿਨਾ ਹਯਾਤਾ ਅਤੇ ਟੋਮੋਕਾਜ਼ੂ ਹਰੀਮੋਤੋ ਦੀ ਜੋੜੀ ਹੱਥੋਂ 2-3 (9-11 9-11 11-8 11-5 7-11) ਨਾਲ ਹਾਰ ਮਿਲੀ। ਜਦਕਿ ਮਹਿਲਾ ਡਬਲਜ਼ ਵਰਗ ਦੇ ਰਾਊਂਡ-16 ‘ਚ ਮਨਿਕਾ ਬੱਤਰਾ ਤੇ ਅਰਚਨਾ ਕਾਮਥ ਦੀ ਜੋੜੀ ਚੀਨੀ ਜੋੜੀ ਮੇਂਗ ਚੇਨ ਅਤੇ ਯਿਦੀ ਵਾਂਗ ਹੱਥੋਂ ਸਖਤ ਮੁਕਾਬਲੇ ‘ਚ 2-3 (2-11 6-11 15-13 12-10 6-11) ਹਾਰ ਗਈ। ਇਸ ਤੋਂ ਪਹਿਲਾਂ ਮਨਿਕਾ, ਸਾਥਿਆਨ ਤੇ ਸ਼ਰਤ ਕਮਲ ਸਿੰਗਲਜ਼ ਵਰਗ ਦੇ ਪਹਿਲੇ ਗੇੜ ‘ਚ ਹੀ ਆਪੋ-ਆਪਣੇ ਮੈਚ ਹਾਰ ਗਏ ਸਨ। ਇਨ੍ਹਾਂ ਤੋਂ ਇਲਾਵਾ ਪੁਰਸ਼ ਡਬਲਜ਼ ਵਰਗ ‘ਚ ਹਰਮੀਤ ਦੇਸਾਈ ਤੇ ਮਾਨਵ ਠੱਕਰ ਵੀ ਪਹਿਲੇ ਗੇੜ ਵਿੱਚੋਂ ਹੀ ਬਾਹਰ ਹੋ ਗਏ ਸਨ।
ਦੂਜੇ ਪਾਸੇ ਆਲ ਇੰਗਲੈਂਡ ਬੈਡਮਿੰਟਨ ਟੂਰਨਾਮੈਂਟ ‘ਚ ਐੱਚ.ਐੱਸ. ਪ੍ਰਨੌਏ ਸਖਤ ਮੁਕਾਬਲੇ ‘ਚ ਚੀਨੀ ਤਾਇਪੈ ਦੇ ਜ਼ੂ ਵੇਈ ਵੈਂਗ ਨੂੰ ਹਰਾ ਕੇ ਦੂਜੇ ਗੇੜ ‘ਚ ਪਹੁੰਚ ਗਿਆ ਹੈ। ਦੁਨੀਆ ਦੇ 9ਵੇਂ ਨੰਬਰ ਦੇ ਭਾਰਤੀ ਖਿਡਾਰੀ ਪ੍ਰਨੌਏ ਨੇ ਪਹਿਲੇ ਗੇੜ ‘ਚ ਵੈਂਗ ਨੂੰ 49 ਮਿੰਟਾਂ ਤੱਕ ਚੱਲੇ ਮੁਕਾਬਲੇ ‘ਚ 21-19 22-20 ਨਾਲ ਹਰਾਇਆ। ਇਸ ਜਿੱਤ ਨਾਲ ਵੈਂਗ ਖ਼ਿਲਾਫ਼ ਪ੍ਰਨੌਏ ਦਾ ਜਿੱਤ-ਹਾਰ ਦਾ ਰਿਕਾਰਡ 5-3 ਹੋ ਗਿਆ ਹੈ। ਦੂਜੇ ‘ਚ ਪ੍ਰਨੌਏ ਦਾ ਮੁਕਾਬਲਾ ਇੰਡੋਨੇਸ਼ੀਆ ਦੇ ਤੀਜਾ ਦਰਜਾ ਪ੍ਰਾਪਤ ਐਂਥਨੀ ਸਿਨਸੁਕਾ ਗਿਨਟਿੰਗ ਅਤੇ ਥਾਈਲੈਂਡ ਦੇ ਕੈਂਟਾਫੋਨ ਵੈਂਗਚਰੋਏਨ ਵਿਚਾਲੇ ਹੋਣ ਵਾਲੇ ਮੁਕਾਬਲੇ ਦੇ ਜੇਤੂ ਨਾਲ ਹੋਵੇਗਾ।
