ਫੀਫਾ ਫੁਟਬਾਲ ਵਰਲਡ ਕੱਪ ਦਾ ਕਤਰ ‘ਚ ਸ਼ਾਨਦਾਰ ਆਗਾਜ਼ ਹੋਇਆ। ਇਹ ਆਗਾਜ਼ ਰੰਗਾਰੰਗ ਪ੍ਰੋਗਰਾਮ ਨਾਲ ਆਲਮੀ ਨੇਤਾਵਾਂ ਅਤੇ ਫੁਟਬਾਲ ਪ੍ਰਸ਼ੰਸਕਾਂ ਸਾਹਮਣੇ ਹੋਇਆ। ਮੱਧ ਏਸ਼ੀਆ ‘ਚ ਫੁਟਬਾਲ ਦਾ ਇਹ ਮਹਾਕੁੰਭ ਪਹਿਲੀ ਵਾਰ ਹੋ ਰਿਹਾ ਹੈ। ਵਰਲਡ ਕੱਪ ‘ਚ ਦੁਨੀਆ ਦੀਆਂ 32 ਟੀਮਾਂ ਇਹ ਆਲਮੀ ਖ਼ਿਤਾਬ ਹਾਸਲ ਕਰਨ ਲਈ ਜ਼ੋਰ ਅਜ਼ਮਾਈ ਕਰਨਗੀਆਂ। ਕਤਰ ਦੇ ਸ਼ਾਸਕ ਆਮਿਰ ਸ਼ੇਖ ਤਮੀਮ ਬਿਨ ਹਮਦ ਅਲ-ਥਾਨੀ ਨੇ ਵਰਲਡ ਕੱਪ ਦਾ ਉਦਘਾਟਨ ਕੀਤਾ ਅਤੇ ਟੂਰਨਾਮੈਂਟ ਦੀ ਕਾਮਯਾਬੀ ਲਈ ਸਾਰੇ ਧਰਮਾਂ ਤੇ ਮਹਾਦੀਪਾਂ ਦੇ ਲੋਕਾਂ ਨੂੰ ਆਪਣੇ ਮੱਤਭੇਦ ਪਾਸੇ ਰੱਖਣ ਦਾ ਸੱਦਾ ਦਿੱਤਾ। ਉਦਘਾਟਨੀ ਸਮਾਗਮ ਅਮਰੀਕਨ ਅਦਾਕਾਰ ਮੌਰਗਨ ਫਰੀਮੈਨ ਦੀ ਮਿੱਠੀ ਆਵਾਜ਼ ਅਤੇ ਊਠਾਂ ਨਾਲ ਇਕ ਅਰਬੀ ਥੀਮ ਸਣੇ ‘ਸਾਰਿਆਂ ਦਾ ਸਵਾਗਤ ਹੈ’ ਦੇ ਵਾਅਦੇ ਨਾਲ ਸ਼ੁਰੂ ਹੋਇਆ। ਖੇਤਰੀ ਬਾਈਕਾਟ ਅਤੇ ਕੌਮਾਂਤਰੀ ਆਲੋਚਨਾ ਮਗਰੋਂ ਪ੍ਰਸ਼ੰਸਕਾਂ ਨੇ ਵਿਸ਼ਵ ਕੱਪ ਲਈ ਕਾਫੀ ਉਤਸ਼ਾਹ ਦਿਖਾਇਆ। ਇਸ ਮੌਕੇ ਸੰਯੁਕਤ ਰਾਸ਼ਟਰ ਦੇ ਜਨਰਲ ਸਕੱਤਰ ਅੰਤੋਨੀਓ ਗੁਟੇਰੇਜ਼, ਅਲਜੀਰੀਆ ਦੇ ਰਾਸ਼ਟਰਪਤੀ ਅਬਦਲਮਾਜਿਦ ਤੈਬੌਨ, ਮਿਸਰ ਦੇ ਰਾਸ਼ਟਰਪਤੀ ਅਬਦਲ ਫਤਾਹ ਅਲ-ਸਿਸੀ, ਸੈਨੇਗਲ ਦੇ ਰਾਸ਼ਟਰਪਤੀ ਮੈਕੀ ਸਾਲ, ਫਲਸਤੀਨ ਦੇ ਰਾਸ਼ਟਰਪਤੀ ਮੁਹੰਮਦ ਅਬਾਸ ਅਤੇ ਰਵਾਂਡਾ ਦੇ ਰਾਸ਼ਟਰਪਤੀ ਪੌਲ ਕਾਗਾਮੇ ਮੌਜੂਦ ਸਨ। ਕਤਰ ਦੇ ਸ਼ਾਸਕ ਨੇ ਵਰਲਡ ਕੱਪ ਦਾ ਉਦਘਾਟਨ ਕੀਤਾ ਤੇ ਟੂਰਨਾਮੈਂਟ ਦੀ ਕਾਮਯਾਬੀ ਲਈ ਸਾਰੇ ਧਰਮਾਂ ਤੇ ਮਹਾਦੀਪਾਂ ਦੇ ਲੋਕਾਂ ਨੂੰ ਆਪਣੇ ਮਤਭੇਦ ਪਾਸੇ ਰੱਖਣ ਦਾ ਸੱਦਾ ਦਿੱਤਾ। ਟੈਂਟ ਦੇ ਆਕਾਰ ਵਾਲੇ ਸਟੇਡੀਅਮ ‘ਚ ਉਦਘਾਟਨੀ ਭਾਸ਼ਣ ਮੌਕੇ ਆਮਿਰ ਸ਼ੇਖ ਤਮੀਮ ਬਿਨ ਹਮਦ ਅਲ-ਥਾਨੀ ਨੇ ਕਿਹਾ, ‘ਸਾਰੇ ਧਰਮਾਂ, ਮੁਲਕਾਂ ਤੇ ਖਿੱਤਿਆਂ ਦੇ ਲੋਕ ਇਥੇ ਕਤਰ ‘ਚ ਇਕੱਠੇ ਹੋਣਗੇ ਅਤੇ ਵੱਖ-ਵੱਖ ਮਹਾਂਦੀਪਾਂ ‘ਚ ਸਕਰੀਨਾਂ ‘ਤੇ ਆਪਣੇ ਉਤਸ਼ਾਹਜਨਕ ਪਲ ਸਾਂਝੇ ਕਰਨਗੇ।’ ਸ਼ੇਖ ਤਮੀਮ ਉਦਘਾਟਨੀ ਸਮਾਗਮ ਮੌਕੇ ਫੀਫਾ ਪ੍ਰਧਾਨ ਜੀ. ਇਨਫੈਂਟੀਨੋ ਨਾਲ ਸਟੇਡੀਅਮ ‘ਚ ਪਹੁੰਚੇ ਜਿੱਥੇ ਦਰਸ਼ਕਾਂ ਅਤੇ ਹੋਰ ਅਰਬ ਨੇਤਾਵਾਂ ਨੇ ਉਨ੍ਹਾਂ ਦਾ ਜ਼ੋਰਦਾਰ ਸਵਾਗਤ ਕੀਤਾ। ਇਸ ਮੌਕੇ ਮੇਜ਼ਬਾਨ ਕਤਰ ਅਤੇ ਇਕੁਆਡੋਰ ਦੀਆਂ ਟੀਮਾਂ ਵਿਚਾਲੇ ਹੋਣ ਵਾਲੇ ਉਦਘਾਟਨੀ ਮੈਚ ਤੋਂ ਪਹਿਲਾਂ ਅਲ ਬਾਇਤ ਸਟੇਡੀਅਮ ‘ਚ ਸਾਊਦੀ ਅਰਬ ਦੇ ਸ਼ਹਿਜ਼ਾਦੇ ਅਤੇ ਮਿਸਰ, ਤੁਰਕੀ ਅਤੇ ਅਲਜੀਰੀਆ ਦੇ ਰਾਸ਼ਟਰਪਤੀ ਵੀ ਹਾਜ਼ਰ ਸਨ। ਕੁਵੈਤ ਦੇ ਸ਼ਹਿਜ਼ਾਦੇ ਨੇ ਵਿਸ਼ਵ ਸਿਹਤ ਸੰਸਥਾ ਦੇ ਡਾਇਰੈਕਟਰ ਜਨਰਲ ਅਤੇ ਜਿਬੂਤੀ ਦੇ ਰਾਸ਼ਟਰਪਤੀ ਨਾਲ ਸ਼ਿਰਕਤ ਕੀਤੀ।
