ਜਾਰਡਨ ਦੇ ਅਕਾਬਾ ਬੰਦਰਗਾਹ ’ਤੇ ਇਕ ਕੰਟੇਨਰ ਤੋਂ ਜ਼ਹਿਰੀਲੀ ਕਲੋਰੀਨ ਗੈਸ ਲੀਕ ਹੋਣ ਕਾਰਨ 12 ਲੋਕਾਂ ਦੀ ਮੌਤ ਹੋ ਗਈ ਅਤੇ 251 ਹੋਰ ਜ਼ਖਮੀ ਹੋ ਗਏ। ਸਰਕਾਰੀ ਅਲ ਮਾਮਲਾਕਾ ਟੀ.ਵੀ. ਦੇ ਹਵਾਲੇ ਨਾਲ ਦੱਸਿਆ ਗਿਆ ਕਿ ਲੀਕੇਜ ’ਚ ਜ਼ਖਮੀ ਹੋਏ ਲੋਕਾਂ ਦੇ ਇਲਾਜ ਲਈ ਅਕਾਬਾ ’ਚ ਇਕ ਵੱਡਾ ਫੀਲਡ ਹਸਪਤਾਲ ਖੋਲ੍ਹਿਆ ਕਿਉਂਕਿ ਲਾਲ ਸਾਗਰ ਬੰਦਰਗਾਹ ਵਾਲੇ ਸ਼ਹਿਰ ਦੇ ਹਸਪਤਾਲ ਪੂਰੀ ਸਮਰੱਥਾ ’ਤੇ ਪਹੁੰਚ ਗਏ ਹਨ। ਅਕਾਬਾ ਸਿਹਤ ਵਿਭਾਗ ਦੇ ਨਿਰਦੇਸ਼ਕ ਜਮਾਲ ਓਬੇਦਾਤ ਨੇ ਕਿਹਾ ਕਿ ਜ਼ਖਮੀਆਂ ਦੀ ਹਾਲਤ ਦਰਮਿਆਨੀ ਤੋਂ ਗੰਭੀਰ ਹੈ। ਉਨ੍ਹਾਂ ਨੇ ਅਕਾਬਾ ਨਿਵਾਸੀਆਂ ਨੂੰ ਘਰਾਂ ’ਚ ਰਹਿਣ ਦੀ ਚੇਤਾਵਨੀ ਦਿੰਦੇ ਹੋਏ ਕਿਹਾ ਕਿ ਜ਼ਹਿਰੀਲੀ ਗੈਸ ਲੀਕ ਹੋਣ ਦਾ ਖ਼ਤਰਾ ਅਜੇ ਵੀ ਬਣਿਆ ਹੋਇਆ ਹੈ। ਇਕ ਅਧਿਆਪਕ ਵਜੋਂ ਕੰਮ ਕਰਨ ਵਾਲੇ ਅਕਾਬਾ ਦੇ ਵਸਨੀਕ ਸਮੇਰ ਜ਼ਬੇਦੇਹ ਨੇ ਦੱਸਿਆ ਕਿ ਸਥਿਤੀ ਡਰਾਉਣੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਮੈਂ ਆਪਣੀ ਪਤਨੀ ਅਤੇ ਦੋ ਧੀਆਂ ਨਾਲ ਘਰ ਰਹਿ ਰਿਹਾ ਹਾਂ। ਅਸੀਂ ਖਿਡ਼ਕੀਆਂ ਅਤੇ ਦਰਵਾਜ਼ੇ ਬੰਦ ਕਰ ਦਿੱਤੇ ਅਤੇ ਅਸੀਂ ਖ਼ਬਰਾਂ ਨੂੰ ਦੇਖ ਰਹੇ ਹਾਂ। ਸਾਨੂੰ ਉਮੀਦ ਹੈ ਕਿ ਇਹ ਬਹੁਤ ਜਲਦੀ ਹੱਲ ਹੋ ਜਾਵੇਗਾ। ਇਹ ਇਕ ਦੁਖਦਾਈ ਘਟਨਾ ਹੈ। ਸਰਕਾਰੀ ਪੈਟਰਾ ਨਿਊਜ਼ ਏਜੰਸੀ ਨੇ ਰਿਪੋਰਟ ਦਿੱਤੀ ਕਿ ਪ੍ਰਧਾਨ ਮੰਤਰੀ ਬਿਸ਼ਰ ਖਾਸਾਵਨੇਹ ਗੈਸ ਟੈਂਕ ਦੇ ਵਿਸਫੋਟ ਦੇ ਨਤੀਜਿਆਂ ਨਾਲ ਨਜਿੱਠਣ ਦੀਆਂ ਕੋਸ਼ਿਸ਼ਾਂ ਦਾ ਨਿਰੀਖਣ ਕਰਨ ਲਈ ਅਕਾਬਾ ਪਹੁੰਚੇ। ਖਾਸਾਵਨੇਹ ਨੇ ਪੀਡ਼ਤ ਪਰਿਵਾਰਾਂ ਨਾਲ ਡੂੰਘੀ ਹਮਦਰਦੀ ਪ੍ਰਗਟ ਕੀਤੀ ਅਤੇ ਜ਼ਖਮੀਆਂ ਦੇ ਜਲਦੀ ਠੀਕ ਹੋਣ ਦੀ ਕਾਮਨਾ ਕੀਤੀ। ਉਨ੍ਹਾਂ ਨੇ ਗ੍ਰਹਿ ਮੰਤਰੀ ਮਜ਼ੇਨ ਫਰਾਇਆ ਨੂੰ ਘਟਨਾ ਦੀ ਜਾਂਚ ਲਈ ਟੀਮ ਦੀ ਅਗਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਇਕ ਰਿਪੋਰਟ ਅਨੁਸਾਰ ਚਮਕਦਾਰ ਪੀਲੀ ਗੈਸ ਦਾ ਇਕ ਵੱਡਾ ਬੱਦਲ ਲੀਕ ਹੋਣ ਤੋਂ ਬਾਅਦ ਜ਼ਮੀਨ ’ਚ ਫੈਲਦਾ ਦੇਖਿਆ ਗਿਆ ਜਿਸ ਨਾਲ ਲੋਕਾਂ ਨੂੰ ਸੁਰੱਖਿਆ ਲਈ ਭੱਜਣਾ ਪਿਆ। ਜ਼ਿਕਰਯੋਗ ਹੈ ਕਿ ਕਲੋਰੀਨ ਇਕ ਰਸਾਇਣ ਹੈ ਜੋ ਉਦਯੋਗ ਅਤੇ ਘਰੇਲੂ ਸਫਾਈ ਉਤਪਾਦਾਂ ’ਚ ਵਰਤਿਆ ਜਾਂਦਾ ਹੈ। ਇਹ ਆਮ ਤਾਪਮਾਨ ਅਤੇ ਦਬਾਅ ’ਤੇ ਪੀਲੀ-ਹਰੀ ਗੈਸ ਹੈ ਪਰ ਆਮ ਤੌਰ ’ਤੇ ਸਟੋਰੇਜ ਅਤੇ ਮਾਲ ਭੇਜਣ ਲਈ ਦਬਾਅ ਅਤੇ ਠੰਢਾ ਕੀਤਾ ਜਾਂਦਾ ਹੈ। ਜਦੋਂ ਕਲੋਰੀਨ ਨੂੰ ਸਾਹ ਜ਼ਰੀਏ ਅੰਦਰ ਲਿਆ ਜਾਂਦਾ ਹੈ, ਨਿਗਲਿਆ ਜਾਂਦਾ ਹੈ ਜਾਂ ਚਮਡ਼ੀ ਦੇ ਸੰਪਰਕ ’ਚ ਆਉਂਦਾ ਹੈ ਤਾਂ ਇਹ ਐਸਿਡ ਪੈਦਾ ਕਰਨ ਲਈ ਪਾਣੀ ਨਾਲ ਪ੍ਰਤੀਕ੍ਰਿਆ ਕਰਦਾ ਹੈ ਜੋ ਸਰੀਰ ’ਚ ਸੈੱਲਾਂ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ। ਕਲੋਰੀਨ ਦੇ ਉੱਚ ਪੱਧਰਾਂ ਨੂੰ ਸਾਹ ਲੈਣ ਨਾਲ ਫੇਫਡ਼ਿਆਂ ’ਚ ਤਰਲ ਬਣ ਜਾਂਦਾ ਹੈ, ਇਕ ਜਾਨਲੇਵਾ ਸਥਿਤੀ ਜਿਸ ਨੂੰ ਪਲਮਨਰੀ ਐਡੀਮਾ ਕਿਹਾ ਜਾਂਦਾ ਹੈ।
